Թուրքիան Երեւանի եւ Անգարայի մէջ դեսպանատուներու փոխադարձ բացման հարցը քննարկելու համար նախադրեալներ չի տեսներ: Այս մասին ազրպէյճանական պետական ԱՓԱ լրատու գործակալութեան հետ հարցազրոյցի ընթացքին յայտարարած է Թուրքիոյ նախագահի գլխաւոր խորհրդական Աքիֆ Քըլըչ:
«Ստեղծուած կացութեան մէջ այս հարցը քննարկելու նախադրեալներ չկան: Ես ատոր վերաբերեալ տեղեկութիւն չունիմ: Կ՛ուզեմ անգամ մը եւս նշել, որ մեր այս հոլովոյթին վերաբերեալ մեր դիրքորոշումը յայտնի է` Ազրպէյճանի եւ Հայաստանի միջեւ խաղաղութեան պայմանագիրը շատ հարցերու լուծման բանալին պիտի ըլլայ: Մեզի համար Ազրպէյճանի անվտանգութիւնը եւ անոր տարածքային ամբողջականութիւնը կարեւորագոյն գործօններն են:
«Խօսելով այս դիրքէն` մենք ուշադիր կը հետեւինք ղարաբաղեան երկրորդ պատերազմէն ետք Ազրպէյճանի եւ Հայաստանի միջեւ տեղի ունեցող հոլովոյթին, խաղաղութեան պայմանագիրի խնդիրին եւ ատոր համապատասխան քայլեր կը ձեռնարկենք: Բնականաբար, քննարկումներու մէջ ենք Հայաստանի հետ: Կան միջազգային կառոյցներ, որոնց մէջ ներկայացուած են Ազրպէյճանը, Թուրքիան եւ Հայաստանը: Մենք կ՛աշխատինք լաւագոյն լուծումը գտնելու, միասին յառաջ շարժելու եւ խաղաղութեան մէջ ապրելու ուղղութեամբ», ըսած է ան:
Leave a Reply