«Միանշանակ կցանականամ, որ Հայաստանի և Թուրքիայի միջև հաստատված լինեն դիվանագիտական հարաբերություններ, սահմանը բաց լինի երկաթուղային, ավտոտրանսպորտային հաղորդակցությունների համար, գործարար կապերը լինեն ուղիղ»,-պատասխանելով թուրք լրագրողների հարցերին` ասել է Նիկոլ Փաշինյանը։
Նրա խոսքով` Հայաստանի և Թուրքիայի միջև ներկա դրությամբ կա ուղիղ երկխոսություն։
«Եթե հաշվի առնենք մեր հարաբերությունների նախընթաց շրջանը, սա շատ կարևոր փոփոխություն է»,-ասել է նա՝ նշելով որ նախկինում կողմերը զրկված են եղել միմյանց տեսակետներն իրար հետ ճշտելու հնարավորությունից։
Անդրադառնալով Հայոց ցեղասպանության խնդիրն՝ Փաշինյանն ասել է. «Մեծ Եղեռնը Հայաստանում ու հայության շրջանում անառարկելի ճշմարտություն է, մեր իրականության մեջ հնարավոր չէ դա ուրանալ կամ ժխտել»:
«Մեր պաշտոնական դիրքորոշումը այն է, որ Հայոց ցեղասպանության միջազգային ճանաչումը մեր արտաքին քաղաքական առաջնահերթությունների մեջ չի մտնում այսօր»,-ասաց Փաշինյանը և հավելեց.
«Սա պաշտոնական ձևակերպում է, բայց այս համատեքստում կան հարցեր, որոնց պարզաբանումը շատ էական է և կարևոր, և այդ հարցերի շուրջ ես հիմնականում աշխատանքային ռեժիմով, անընդհատ խոսում եմ և Հայաստանում, և արտերկրում մեր հայրենակիցների հետ զրույցում:
Քննարկումներ և շահարկումներ կան, խոսք է գնում ուրացման, Մեծ եղեռնը ուրանալու կամ մոռանալու մասին: Ես ուզում եմ շատ հստակ լինի, որ Հայաստանում և հայության շրջանում դա անառարկելի ճշմարտություն է։ Այսինքն, ուղղակի մեր իրականության մեջ հնարավոր չի դա ժխտել կամ ուրանալ, որովհետև դա բոլորիս համար անուրանալի ճշմարտություն է»:
Leave a Reply