Սենթ Էթիէնի քաղաքապետին գլխաւորած պատուիրակութիւնը այցելած է Ծիծեռնակաբերդ

Մարտ 1-ին, Սենթ էթիէնի քաղաքապետ Կաէլ Փերտրիոյի գլխաւորած պատուիրակութիւնը այցելած է Հայոց ցեղասպանութեան յուշահամալիր` Կապանի փոխքաղաքապետ Կոռ Թադեւոսեանի ուղեկցութեամբ:

Պատուիրակութեան մաս կազմած են` Սենթ էթիէնի հայկական ընկերակցութեան նախագահ Վրէժ Խոսրովեան, Սենթ էթիէնի քաղաքապետի խորհրդական, Հայոց ցեղասպանութիւնը վերապրածի շառաւիղ Ժան-Փիեր Քոչեան եւ այլ անձնաւորութիւններ:

Հիւրերը դիմաւորած է Հայոց ցեղասպանութեան թանգարան-հիմնարկի տնօրէնուհի Էթիտա Գզոյեանը եւ անոնց ուղեկցած դէպի Հայոց ցեղասպանութեան յուշահամալիր` ներկայացնելով կոթողին ստեղծման պատմութիւնը:

Քաղաքապետ Փերտրիօ ծաղկեպսակ զետեղած է Հայոց ցեղասպանութեան զոհերու յիշատակը յաւերժացնող յուշակոթողին, այնուհետեւ պատուիրակութեան անդամները անմար կրակին մօտ մէկ վայրկեան լռութեամբ յարգած են սրբադասուած նահատակներուն յիշատակը:

Ֆրանսայէն եկած հիւրերը շրջած են նաեւ Հայոց ցեղասպանութեան թանգարանին մէջ եւ ծանօթացած` մնայուն եւ առժամեայ ցուցադրութիւններուն, որմէ ետք Սենթ էթիէնի քաղաքապետը եւ անոր խորհրդականը իրենց տպաւորութիւնները արձանագրած են պատուոյ հիւրերու ոսկեմատեանին մէջ:

Շնորհակալութիւն յայտնելով այցելութեան համար` Հայոց ցեղասպանութեան թանգարան-հիմնարկի տնօրէնուհին ֆրանսացի պատուիրակներուն նուիրած է Հայոց ցեղասպանութեան մասին պատմող գիրքեր: Ժան-Փիեր Քոչեանն ալ, իր կարգին, թանգարանին յանձնած է իր ստեղծագործած «Սատանայի գործը» («L’œuvre du diable») կտաւը:

Հայրենի Կեանք