Լեմկինի ինստիտուտ. Նիկոլ Փաշինյանի հայտարարությունները համահունչ են թուրքական ժխտողական նարատիվներին

Լեմկինի ինստիտուտն արձագանքել է Նիկոլ Փաշինյանի՝ Հայց ցեղասպանության վերաբերյալ հայտարարություններին՝ ընդգծելով, որ դրանք համահունչ են թուրքական ժխտողական նարատիվներին։

«Նրա իմաստազուրկ հայտարարություններն անտեսում են թուրք, գերմանացի, բրիտանացի, ամերիկացի,  հայ ու ազգությամբ այլ գիտնականների՝ Հայոց ցեղասպանության վերաբերյալ տասնամյակներ տևած պատմական հետազոտությունները, խոչընդոտում են Հայոց ցեղասպանության զոհերի՝ արդարության համար շարունակվող պայքարին և ստեղծում վտանգավոր աշխարհաքաղաքական դինամիկա, հատկապես Ադրբեջանի կողմից արցախահայերի նկատմամբ վերջերս իրականացված ցեղասպանության և Հայաստանի Հանրապետությանը սպառնացող շարունակական սպառնալիքների համատեքստում»,-ասված է  ինստիտուտի հայտարարության մեջ։

Հայտարարության հեղինակները նշել են, որ անցյալ շաբաթ Նիկոլ Փաշինյանը հանդիպել է մի խումբ սփյուռքահայերի հետ Շվեյցարիայում և, օգտագործելով իրեն բնորոշ հանելուկային լեզու, կարծես կասկածի տակ է դրել 1915 թվականի Հայոց ցեղասպանության հաստատված պատմական եղելությունը։

Ընդգծվում է, որ նման հայտարարություն հնչում է երեք ամիս այն բանից հետո, երբ ԱԳ նախարարությունը որոշում է, որ Հայոց ցեղասպանության ճանաչումն այլևս արտաքին քաղաքականության առաջնահերթությունների թվում չէ։

«Մենք այս հայտարարություններն ու որոշումները դիտարկում ենք որպես Հարավային Կովկասում իր թշնամական հարևանների նկատմամբ Հայաստանի դիվանագիտական և ռազմական թուլության հետևանք»,-ասված է հայտարարության մեջ։

https://www.panorama.am/am/news/2025/01/30/%D4%BC%D5%A5%D5%B4%D5%AF%D5%AB%D5%B6%D5%AB-%D5%AB%D5%B6%D5%BD%D5%BF%D5%AB%D5%BF%D5%B8%D6%82%D5%BF/3108237