Հունվարի 22-ին Թուրքիայի ընդդիմադիր քրդամետ Ժողովուրդների հավասարություն և ժողովրդավարություն կուսակցության (DEM) պատվիրակությունը 2-րդ հանդիպումն է ունենալու Աբդուլլահ Օջալանի հետ:
Թուրքիայի կողմից ահաբեկչական ճանաչված Քուրդիստանի բանվորական կուսակցության (ՔԲԿ/PKK) հիմնադիր-առաջնորդի հետ հանդիպումը կայանալու է իր մեկուսավայրում՝ Իմրալը կղզում, որտեղ նա ցմահ ազատազրկման է ենթարկված:
Առաջին հանդիպումը եղել է դեկտեմբերի 28-ին: Այն մեկնարկել է Թուրքիայի իշխող Արդարություն և զարգացում կուսակցության (ԱԶԿ-AKP) հետ «Ժողովուրդ» դաշինքի մեջ գտնվող Ազգայնական շարժում կուսակցության (ԱՇԿ-MHP) առաջնորդ Դևլեթ Բահչելիի հայտարարություն-առաջարկությամբ:
Թուրքական մամուլում նշվում է, որ Օջալանի հետ PKK-ի՝ զենքերը վայր դնելու շուրջ իրականացվող բանակցությունների ընթացքը բավականին արագ է ընթանում և փետրվարի 15-ին հնարավոր է այդ ուղղությամբ համապատասխան հայտարարություն լինի:
Շրջանառվում է Օջալանի PKK-ին ուղղված 3 հնարավոր կոչ. կուսակցության մասնատման, դրա կողմից Թուրքիայում իրականցվող ռազմական գործողությունների դադարեցման և կամ զենքերը վայր դնելու մասին:
Նշենք, որ հայտնի չէ, թե Օջալանի հետ հանդիպումից հետո DEM կուսակցության պատվիրակությունը հանրային որևէ իրազեկմամբ հանդես կգա, թե ոչ:
Նույնը կապված է նաև հաջորդ հնարավոր հանդիպման վերաբերյալ տեղեկության հետ, քանի որ այս հանդիպման և ամբողջ գործընթացի անխոչընդոտ ընթացքից է կախված կոչի լինելու չլինելու հարցը:
Հիշեցնենք, որ Բահչելին Թուրքիայի ազգային ժողովի ԱՇԿ ֆրակցիայի հետ հանդիպման ընթացքում հայտարարել էր հետագայում մեծ քննարկումների առարկա դարձած առաջարկության մասին:
Բահչելին նշել էր, որ PKK-ի հետ խնդիրն ամբողջությամբ հանգուցալուծելու նպատակով թո՛ղ Օջալանն ինքն անձամբ DEM-ի անունից խորհրդարանում հանդես գա խմբավորման PKK-ի մասին կոչով:
https://www.ermenihaber.am/am/news/2025/01/22/%D4%B9%D5%B8%D6%82%D6%80%D6%84%D5%AB%D5%A1-PKK/295552
Leave a Reply