Ստամբուլում «Ակօս» շաբաթաթերթի խմբագրության դիմաց, որտեղ տեղի է ունեցել Դինքի սպանությունը, հունվարի 19–ին Դինքի մահվան 18-րդ տարելիցին նվիրված հիշատակի միջոցառում է տեղի ունեցել։
Ինչպես տեղեկանում ենք Ստամբուլի հայկական «Ակօս»–ից, նախատեսված ժամին հազարավոր քաղաքացիներ «Այստեղ ենք, ախպարիգ» բացականչություններով եւ հայերեն, թուրքերեն եւ քրդերեն պաստառներով մոտեցել են «Ակօս»–ի գրասենյակի մոտ։
Դինքի հիշատակին նվիրված սգո միջոցառմանը մասնակցել են Շիշլիի քաղաքապետ Ռեսուլ Էմրահ Շահանը, Բահչելիէվլերի քաղաքապետ Հաքան Բահադըրը, Թուրքիայի գլխավոր ընդդիմադիր Ժողովրդահանրապետական (CHP) կուսակցության Ստամբուլի նահանգային կառույցի ղեկավար Օզգյուր Չելիքը, CHP–ի պատգամավոր Սեզգին Թանրըքուլուն, քրդական կուսակցության ներկա եւ նախկին պատգամավորներ, բազմաթիվ քաղաքական, հասարակական եւ մշակութային գործիչներ։
Հավաքի ժամանակ ընթերցվել է Գեզի այգու դեպքերից հետո ձերբակալված Օսման Քավալայի ուղերձը, իսկ հիմնական ելույթ ունեցողը եղել է Դինքի ընկերներից Թագուհի Թովմասյանը։
Հիշեցնենք, որ 2007 թվականի հունվարի 19–ին, Ստամբուլում «Ակօս» շաբաթաթերթի գրասենյակի դիմաց սպանվեց «Ակօս»–ի գլխավոր խմբագիր, ստամբուլահայ հասարակական գործիչ Հրանտ Դինքը։ Տարիներ տեւած դատական գործընթացների արդյունքում ձերբակալվել եւ ազատ են արձակվել ներկա եւ նախկին զինվորականներ, ոստիկաններ, դատապարտվել են ազատազրկման տարբեր պաշտոնյաներ։ Սակայն Դինքի փաստաբանները շեշտում են, որ գլխավոր կազմակերպիչները բացահայտված չեն, իսկ դատարանի սահմանած պատժաչափերը շատ մեղմ են։
Leave a Reply