«Կեցցե՛ Դամասկոսը նվաճողը». Էրդողանի նկարով պաստառներ Իրանի փողոցներում

Հիմնականում թյուրքախոսներով բնակեցված Իրանի Թավրիզ քաղաքում վերջին շրջանում նկատվել են թուրքամետ պաստառներ:

Մասնավորապես Թավրզի փողոցներում հայտնվել են Թուրքիայի նախագահ Ռեջեփ Թայիփ Էրդողանի լուսանկարները, որոնց վրա գրված է եղել. «‎Yaşasın  Şam Fatihi» (Կեցցե Դամասկոսը նվաճողը):

Միջանկյալ նշենք, որ Սիրիայում իշխանության եկած ուժերը, տարիներ շարունակ աջակցություն  են ունեցել Թուրքիայի կողմից և ամուր կապեր պաշտոնական՝ Անկարայի հետ:

Պատահական չէ, որ Թուրքիան  առաջիններից էր, ով ողջունեց Սիրիայում տեղի ունեցած իշխանափոխությունը՝ պնդելով, սակայն , որ Անկարան այդ ամենի հետ կապ չունի: Դրան հաջորդել էին նաև Թուրքիայի ազգային հետախուզության կազմակերպության ղեկավարի, իսկ այնուհետև արտգործնախարարի այցերը Դամասկոս, որոնց ընթացքում հանդիպումներ եղան Սիրիայի իշխանության նոր ղեկավար շրջանակների հետ:

Հիշեցնենք, որ «Fatih» մականուն նաև ուներ Օսմանյան կայսրության Մեհմեդ 2-րդ սուլթանը, ով 1453-ին նվաճել էր  Բյուզանդիայի մայրաքաղաք Կոստանդնուպոլիսը և անվանափոխել Ստամբուլ:

https://www.ermenihaber.am/am/news/2025/01/09/%D4%B9%D5%B8%D6%82%D6%80%D6%84%D5%AB%D5%A1-%D4%BB%D5%90%D5%A1%D5%B6/294152