Հայոց ցեղասպանության թանգարան-ինստիտուտում տեղի ունեցավ «Հայոց ցեղասպանության թեմայի կրթական հեռանկարները» խորագիրը կրող միջոցառումը, որի ընթացքում ներկայացվեց Ուրուգվայից իր ուսուցչի հետ հատուկ այս նպատակով Հայաստան ժամանած 17-ամյա Ռոմինա Ֆախարդոյի հեղինակած «Ճանաչման և լռության միջև» շարադրությունը, որը հաղթող է ճանաչվել Ուրուգվայի միջնակարգ դպրոցներում Հայոց ցեղասպանության զոհերի հիշատակի միջոցառումների շրջանակում անցկացված շարադրությունների մրցույթում:
«Արմենպրես»-ի հաղորդմամբ՝ «Հայոց ցեղասպանության թեմայի կրթական հեռանկարները» միջոցառմանը մասնակցում էին Հայոց ցեղասպանության թանգարան-ինստիտուտի տնօրեն Էդիտա Գզոյանը, ՀՀ կրթության, գիտության, մշակույթի և սպորտի նախարարության սփյուռքի հետ կապերի բաժնի գլխավոր մասնագետ Ալվինա Էլոյանը, ՀԲԸՄ հայաստանյան գրասենյակի ղեկավար Վազգեն Յակուբյանը, ՀԲԸՄ Ուրուգվայի մասնաճյուղի կրթական բաժնի տնօրեն Խավիեր Փոլադյանն, ինչպես նաև Ուրուգվայի հանրակրթության ազգային ադմինիստրացիայի լեզուների քաղաքականության հարցերով տնօրեն Ալդո Ռոդրիգեսը։ Միջոցառմանը ներկա էին նաև հայաստանյան ավագ դպրոցների աշակերտներ և ուսուցիչներ:
Միջոցառման բացմանը ողջույնի խոսքով հանդես եկավ Հայոց ցեղասպանության թանգարան-ինստիտուտի տնօրեն Էդիտա Գզոյանը՝ շնորհակալություն հայտնելով Ուրուգվայից ժամանած հյուրերին և բարձր գնահատելով վերջիններիս կատարած աշխատանքը։
«Գիտենք, որ Հայոց ցեղասպանության մասին սովորում ենք ոչ միայն մենք՝ հայերս, այլև սովորում են աշխարհի տարբեր վայրերում ապրող շատ ու շատ հայ աշակերտներ, ինչը մեզ համար շատ կարևոր և ողջունելի է։ Այսօրվա մեր գլխավոր հյուրը ուրուգվայցի 17-ամյա մի աղջիկ է, ով իր դպրոցում մասնակցել է մի միջոցառման, որի շրջանակներում ներկայացրել է իր շարադրությունը, որն ամբողջ Ուրուգվայում հաղթող է ճանաչվել», – նշեց Էդիտա Գզոյանը՝ հիշեցնելով, որ Ուրուգվայն առաջին պետությունն է, որը ճանաչել է Հայոց ցեղասպանությունը։
Նա նշեց, որ Հայոց ցեղասպանության դասավանդումը հատկապես այլ երկրում չափազանց կարևոր է հայոց պատմության իրադարձությունների միջազգային ճանաչման առումով։
Էդիտա գզոյանը ներկաներին տեղեկացրեց, որ Հայոց ցեղասպանության թանգարան-ինստիտուտը մեծ աշխատանքներ է տանում, որպեսզի հանրակրթական դպրոցներում «Հայոց ցեղասպանության հիմնահարցեր» անունով հատուկ առարկա մտցվի։
Հայաստանի Հանրապետության կրթության, գիտության, մշակույթի և սպորտի նախարարության սփյուռքի հետ կապերի բաժնի գլխավոր մասնագետ Ալվինա Էլոյանն իր խոսքում ընդգծեց, որ միջոցառման նպատակն է քննարկել ոչ միայն հայ ժողովրդի պատմության ամենասարսափելի, բայց նաև ամենակարևոր էջերից մեկը՝ Հայոց ցեղասպանությունը։
«Այն, ինչ տեղի ունեցավ 1915 թվականին, շարունակում է մնալ բաց վերք հայ ժողովրդի հիշողության մեջ, ինչպես նաև միջազգային պատմության համար», – նշեց ԿԳՄՍ նախարարության ներկայացուցիչը՝ հավելելով, որ Հայոց ցեղասպանության դասավանդումը սփյուռքի դպրոցներում համարվում է կարևոր կրթական գործընթաց, որը նպաստում է հայ ժողովրդի պատմության ճանաչմանը, անցյալի հետ կապված իրադարձությունների գիտակցմանը և ցեղասպանությունների կանխարգելմանը։
Նա նաև շեշտեց, որ Հայոց ցեղասպանության զոհերի հիշատակը խթանում է յուրաքանչյուր սերնդի պարտավորությունը՝ պահպանելու նրանց անունները և պատմությունը։
«Դասերը կրում են նաև կրթական արժեք, քանի որ դրանք օժանդակում են սփյուռքի համայնքներին դասավանդել այնպիսի արժեքներ, ինչպիսիք են համամարդկային իրավունքների պաշտպանության և խաղաղության կարևորությունը», – ասաց Էլոյանը։
ԿԳՄՍ ներկայացուցչի խոսքով՝ այդ դասավանդումը նպաստում է նաև այնպիսի կարևոր թեմաների ուսուցմանն, ինչպիսիք են ցեղասպանության նախադրյալները, ընթացքը, դրա հետևանքները և միջազգային մակարդակով այն ճանաչելու կարիքը՝ ամրապնդելով նաև Հայոց ցեղասպանության միջազգային ճանաչման պայքարը։
«Սփյուռքի դպրոցներում Հայոց ցեղասպանության դասավանդումը ոչ միայն պատմական հարց է, այլև հասարակական և էթիկական խնդիր։ Դասավանդման արդյունավետությունը կախված է նրանից, թե որքանով են դպրոցներն ու համայնքները կարողանում ներգրավել նոր սերունդներին», – եզրափակեց ՀՀ ԿԳՄՍՆ սփյուռքի հետ կապերի բաժնի գլխավոր մասնագետ Ալվինա Էլոյանը։
Միջոցառմանն իր խոսքն ասաց նաև Հայկական բարեգործական ընդհանուր միության (ՀԲԸՄ) հայաստանյան գրասենյակի ղեկավար Վազգեն Յակուբյանը՝ կարևորելով միջոցառման անցկացումը և Հայոց ցեղասպանության դասավանդման և ճանաչելիության մեծացման ուղղությամբ կատարվող աշխատանքները։
«Երբ անարդարությունը հաղթում է, այն մշտապես հանգեցնում է զոհերի։ Դրա լուծման ճանապարհն անխախտելի պահանջատիրությունն է։ Ես ուրախ եմ իմ գոհունակությունն արտահայտել Ուրուգվայի ՀԲԸՄ-ի և Ուրուգվայի կրթության նախարարության միջև համագործակցության կապակցությամբ։ Մարդու իրավունքների և արդարության նկատմամբ Ուրուգվայի հանձնառությունը հիացմունքի է արժանի», – նշեց Վազգեն Յակուբյանը՝ շնորհակալություն հայտնելով միջոցառման կազմակերպիչներին։
ՀԲԸՄ Ուրուգվայի մասնաճյուղի կրթական բաժնի տնօրեն Խավիեր Փոլադյանն իր հերթին շատ կարևոր համարեց, որ Հայոց ցեղասպանության դասավանդումը կրի ոչ միայն համահայաստանյան, այլև միջազգային բնույթ, քանի որ դրանով Հայոց ցեղասպանության պատմությունը կդառնա ոչ միայն հայկական հարց, այլև համաշխարհային նշանակություն ձեռք կբերի։
«Ամենակարևոր մարտահրավերներից մեկը, որին մենք բախվում ենք ոչ միայն սփյուռքում, այլև Հայաստանում, Հայոց ցեղասպանության հարցի՝ որպես համաշխարհային հարցի ընկալումն է։ Մարտահրավերն այն է, որ այս հարցը ստանա համաշխարհային բնույթ։ Այդ հարցը ոչ միայն հայ քաղաքակրթության, այլև գլոբալ քաղաքակրթությանը վերաբերող հարց է», – ընդգծեց Փոլադյանը՝ հատկապես մատնանշելով այն հանգամանքը, որ նման աշխատանքներով հանդես է եկել հենց Ուրուգվայը՝ պետական մակարդակով։
Միջոցառմանը ներկա էր նաև Ուրուգվայի հանրակրթության ազգային ադմինիստրացիայի լեզուների քաղաքականության հարցերով տնօրեն Ալդո Ռոդրիգեսը, ով ևս շնորհակալություն հայտնեց ջերմ ընդունելության համար՝ մեծապես կարևորելով անցկացվող միջոցառման խորհուրդը։
«Ուրուգվայի կառավարության և կրթական համակարգի անունից ցանկանում եմ նշել, որ մենք շատ հպարտ ենք այստեղ լինելու համար։ Սա, հավանաբար, լավագույն վայրն է, որտեղ կարող էինք ներկայացնել կատարված աշխատանքները։ Ուրուգվայը բազմամյա հարաբերություններ, կապեր և ավանդույթներ ունի հայերի հետ։ Սա կապված չէ միայն հայերի հետ, մենք Հայոց ցեղասպանությունը չենք դիտարկում որպես մի իրադարձություն, որը տեղի է ունեցել այլ ժողովրդի հետ, այլ դիտարկում ենք դժբախտություն այն մարդկանց նկատմամբ, ովքեր ապրում են մեզ հետ կողք կողքի և մեր կյանքի մի մասն են», – ընդգծեց Ալդո Ռոդրիգեսը։
Ողջույնի խոսքերից հետո 17-ամյա Ռոմինա Ֆախարդոն և նրա ուսուցիչ Մարի Կորալեսը մանրամասն ներկայացրին իրենց կատարած աշխատանքը և հաղթող ճանաչված էսսեի բովանդակությունը։
Leave a Reply