Անկարայի մերձակայքում տեղի ունեցած ահաբեկչության զոհերի թիվն աճել է. «վնասազերծվել» է երկու ահաբեկիչ

Թուրքիայի ներքին գործերի նախարար Ալի Երլիքայան հայտարարել է, որ մայրաքաղաք Անկարայի մերձակայքի Թուրքիայի օդատիեզերական արդյունաբերության (Turkish Aerospace Industries, TUSAS) ձեռնարկությունում տեղի ունեցած ահաբեկչության զոհերի թիվը հասել է հինգի, հայտնում է CNN Turk-ը։

Ըստ թուրք նախարարի՝ վիրավորների ընդհանուր թիվը կազմել է 22 մարդ։ Նա միաժամանակ հայտնել է, որ երկու ահաբեկիչները՝ կին և տղամարդ, «վնասազերծվել են»։ Մատնահետքերի  նույնականացման և անձերի ինքնության հաստատման գործընթացը շարունակվում է։

«Հենց որ դրանք հայտնի դառնան, կներկայացնենք նրանց ինքնությունը և տեղեկությունը, թե որ ահաբեկչական կազմակերպությունն է դրա համար պատասխանատու», – հավելել է Երլիքայան։

Անկարայի մերձակայքում չորեքշաբթի Turkish Aerospace Industries շտաբ-բնակարանում պայթյուն և հրաձգություն է եղել։

Թուրքիայի ՆԳՆ ղեկավարը տեղի ունեցածն անվանել է ահաբեկչություն։

TUSAS-ը Թուրքիայի պաշտպանական արդյունաբերության համար շարժիչներ արտադրող ձեռնարկություն է։

https://news.am/arm/news/848838.html