Թուրքիայի արտաքին գործերի նախարար Հաքան Ֆիդանը Ստամբուլում «3+3» տարածաշրջանային պլատֆորմի հանդիպման ժամանակ, որին կմասնակցեն Հայաստանի եւ ՌԴ արտգործնախարարներ Արարատ Միրզոյանը եւ Սերգեյ Լավրովը, կընդգծի Անկարայի աջակցությունը Բաքվի եւ Երեւանի միջեւ խաղաղության պայմանագրի կնքմանը, տեղեկացրել է «ՌԻԱ Նովոստիին» դիվանագիտական աղբյուրն Անկարայում։
«Սպասվում է, որ իր ելույթում նախարար Ֆիդանը կհայտարարի այն մասին, որ Անկարայի ջանքերն ուղղված են խաղաղության եւ կայունության հաստատմանը Կովկասում։ Սպասվում է, որ շեշտը կդրվի այն բանի վրա, որ տարածաշրջանային պատասխանատվությունը խնդիրների լուծման առավել արդյունավետ միջոցն է։ Նախարարը կընդգծի, որ Թուրքիան աջակցում է գործընթացին, որին զուգահեռ ընթանում է Թուրքիայի եւ Հայաստանի հարաբերությունների կարգավորման գործընթացը»,- ասել է գործակալության զրուցակիցը։
Դիվանագիտական աղբյուրի խոսքով՝ հանդիպման մասնակիցները կընդունեն համատեղ հայտարարություն՝ ընդգծելով հակամարտությունների խաղաղ կարգավորման անհրաժեշտությունը։
Leave a Reply