Փաշինյանը՝ Ցեղասպանությունը ժխտողի դերու՞մ

Հայկա Ալոյան

Ցեղասպանությունների կանխարգելման Լեմկինի անվան ինստիտուտը հանդես է եկել աննախադեպ հայտարարությամբ՝ ՀՀ վարչապետ Նիկոլ Փաշինյանին մեղադրում են Հայոց ցեղասպանությունը ժխտող քաղաքականություն տանելու մեջ։ 

Հայտարարության մեջ մասնավորապես ասվում է․ «Թեեւ մենք ընդհանրապես չենք ներգրավվում պետությունների ներքին գործերին, քանի դեռ չկա ցեղասպանության ներքին վտանգ, մենք պետք է անդրադառնանք Հայաստանի վարչապետ Նիկոլ Փաշինյանի վերջին հայտարարություններից բխող մտահոգություններին, որոնք, ըստ երեւույթին, շեղվում են ցեղասպանության կանխարգելման, ցեղասպանության ճանաչման եւ անցումային արդարադատության հիմնարար սկզբունքներից եւ որոնք ուղղակիորեն առնչվում են Հայաստանի ազգային անվտանգության խնդիրներին։ Սա է՛լ ավելի կարեւոր է դառնում Ադրբեջանի տարածքային պահանջների եւ վերջին տասնամյակների ընթացքում հայերի նկատմամբ տեւական ցեղասպան քաղաքականության համատեքստում»։

Ապա շեշտում են, որ Փաշինյանը ցեղասպանության մեղավորությունը դնում է զոհերի վրա՝ Թուրքիայի եւ Ադրբեջանի  պատասխանատվությունը կասկածի տակ դնելու նպատակով։ Նշվում է, որ նա ոչ մի կերպ չի հիշատակում ցեղասպանության մեղավորներին՝ Թուրքիային եւ Ադրբեջանին։ Պատկերացնել նման իրավիճակ՝ թվում է, թե անհնար է՝ աբսուրդի թատրոն, սակայն փաշինյանական Հայաստանում այս կարմիր գծերն էլ անցան։ Ինստիտուտի աչքից չի վրիպել անգամ ՔՊ-ական Անդրանիկ Քոչարյանի հայտարարությունը, թե անուն առ անուն պետք է ճանաչել ցեղասպանության զոհերին՝ փաստացի կասկածի տակ դնելով նաեւ ցեղասպանության զոհերի 1.5 միլիոն լինելու հանգամանքը։

Թուրքագետ, «Արեւմտահայոց ուսումնասիրության կենտրոն» գիտահետազոտական հիմնադրամի թուրքերեն բաժնի պատասխանատու Մելինե Անումյանը, անդրադառնալով Լեմկինի ինստիտուտի հայտարարությանը, ասաց, որ միջազգային պրակտիկայում նման բան չկա` սա հերթական խայտառակությունն է մեզ համար։

«Ղեկավար, որը ոչ միայն պաշտպանում է թշնամու երկրի շահերը, այլ նաեւ բացահայտ հանդես է գալիս նրանց դիրքորոշմամբ, եւ կատարյալ ամոթ է, որ միջազգային կազմակերպությունն է այս անգամ հանդես գալիս նման քննադատությամբ։ Դա նաեւ փաստ է նրանց համար, ովքեր դեռ կասկածում են, թե արդյոք ներկայիս իշխանությունները սպասարկո՞ւմ են Թուրքիայի շահը, թե՞ ոչ»,-ասաց Անումյանը` այլեւս դա բացահայտ փաստ եւ նրանց հիմնական գործառույթը համարելով։ 

Անումյանը նշեց, որ Լեմկինի ինստիտուտը լուրջ մտահոգություններ ունի, որ հայ ժողովուրդն այս պահին էլ լուրջ ցեղասպանության վտանգի առաջ է կանգնած։ 

«Լեմկինի ինստիտուտի այս հայտարարությունը պետք է ոչ միայն որպես քննադատություն ընդունել, այլ որպես մտահոգություն՝ մեր անվտանգության հետ կապված, քանի որ ինստիտուտը լծված է նաեւ ներկայիս ցեղասպանության վտանգներն ահազանգելուն»,-ասաց թուրքագետը։

Փաստացի, Lեմկինի ինստիտուտն ահազանգում է ցեղասպանության վտանգի մասին։ Հիշեցնենք, որ դեռեւս մարտի 28-ին ԱՄՆ Լեմկինի անվան ցեղասպանության կանխարգելման ինստիտուտի ներկայացուցիչ Էլիսա ֆոն Յուդեն-Ֆորգը «Հրապարակի» հետ զրույցում ասել էր, որ Արցախում ցեղասպանությունից հետո այժմ նույն վտանգի առաջ է կանգնած ՀՀ 3 միլիոն բնակչությունը։

«Հայաստանի խնդիրն իսկապես գոյաբանական է, այս պանթուրքական ծրագրի, այսպես կոչված՝ միջանցքի, Թուրքիայի, Ադրբեջանի քաղաքականության նպատակները հստակ են՝ պարզապես ճզմել, դուրս մղել Հայաստանը եւ ստեղծել 3 միլիոն հայերից բաղկացած գաղթականների մի խումբ»,- մեզ հետ զրույցում ասել էր Ֆոն Յուդեն-Ֆորգը։
Դիվանագետ Վահագն Մելիքյանը մեզ հետ զրույցում մեծագույն ամոթ, աննախադեպ խայտառակություն որակեց Լեմկինի ինստիտուտի անդրադարձը։ «Սա ամոթանք է առաջին հերթին մեզ, ամոթանք է ուղղակի։ Լեմկինի ինստիտուտը, այդ հզորագույն կառույցը, որը երբեք ներքին գործընթացներին չխառնվող կառույց է, ինչքան պետք է այդ սանդղակը պայթեցնի, որ այդ մարդիկ հանդես գան նման հայտարարությամբ Միացյալ Նահանգներից։ Չգիտեմ նույնիսկ, թե ինչ որակում տալ դրան»,- ասաց Մելիքյանը։

Ըստ նրա, սա ուրացման հաստատումն է, այստեղ արդեն չեն կարող ասել, թե մեղադրանքների հեղինակը 5-րդ շարասյունն է, չեն կարող ասել, որ գնացել են ու ինչ-որ ճնշումների են ենթարկել Լեմկինի ինստիտուտը՝ դրա համար է այս հայտարարությունն արվել․ «Հասկանո՞ւմ եք Լեմկինի ինստիտուտի վարկանիշը»։
Եթե այդ ինստիտուտի լրջությունը Փաշինյանն ու իր ՔՊ-ական խումբը հասկանար, հերթական Օվերտոնի պատուհանը չէին բացի՝ կարծում է դիվանագետը։

https://hraparak.am/