Թուրքիայում «ի շահ չինական հետախուզության՝ ույղուրներին լրտեսելու մեջ» մեղադրանքով վեց մարդ է ձերբակալվել

Թուրքական իշխանությունները ձերբակալել են վեց մարդու, ովքեր կասկածվում են «ի շահ չինական հետախուզության` Թուրքիայում ույղուրներին լրտեսելու մեջ», ևս մեկ կասկածյալի փնտրում է ոստիկանությունը, հայտնում է Anadolu-ն։

Ստամբուլի դատախազները հայտնաբերել են յոթ անձի, ովքեր, ենթադրաբար, «տեղեկություններ են հավաքել Թուրքիայում ույղուր համայնքի նշանավոր ներկայացուցիչների և նրանց հետ կապված որոշ ասոցիացիաների մասին», գրում են թուրքական լրատվամիջոցները։

Թուրքիայում ապրում է մոտավորապես 50,000 ույղուր, որոնք կազմում են Կենտրոնական Ասիայի սահմաններից դուրս ամենամեծ ույղուրական սփյուռքը: Թուրքերը սերտ էթնիկ, կրոնական և լեզվական կապեր ունեն ույղուրների հետ, որոնք հիմնականում մուսուլմաններ են, ովքեր խոսում են թյուրքական լեզվով:

Անկարան արդեն մի քանի տարի է՝ Պեկինին մեղադրում է ույղուրներին ճնշելու մեջ։ Չինաստանը հերքում է իրեն ուղղված մեղադրանքները։

https://news.am/arm/news/808441.html