Փորձագետները դեռևս չեն արձանագրել Թուրքիայի ամենամեծ գետի՝ Եփրատի աղտոտվածությունը երկրի արևելքում գտնվող Էրզինջան (Երզնկա-Ակունքի խմբ․) նահանգի ոսկու հանքում քարի փլուզումից հետո։ Այս մասին հայտնել է շրջանի նահանգապետ Համզա Այդոգդուն։
«Եփրատ գետի աղտոտվածություն չի եղել, այնտեղ վնասակար նյութեր չեն մտել», – ասել է նա NTV հեռուստատեսության եթերում: Թուրքիայի բնապահպանության նախարարությունն իր հերթին հայտնել է, որ Եփրատի աղտոտումը կանխելու նպատակով փակվել է դեպքի վայրի մոտ գտնվող հեղեղատարներից մեկը։ «Մենք փակել ենք հեղեղատի դարպասները, որտեղ Սաբիրլի գետը լցվում է Եփրատ գետ՝ կանխելու համար սողանքից առաջացած նյութերի մուտքը այնտեղ», – ասվում է նախարարության հայտարարության մեջ:
Թուրքիայի ՆԳՆ ղեկավար Ալի Երլիքայայի վերջին տվյալներով՝ հանքում կա ինը աշխատող, որոնց որոնողական աշխատանքներում ներգրավված են 400 հոգուց բաղկացած փրկարարական ջոկատներ։
Թուրքիայի նախագահ Ռեջեփ Թայիփ Էրդողանը, ով ներկայում գտնվում է արտերկրում, հրամայել է մոբիլիզացնել բոլոր ռեսուրսները՝ հանքում Anagold մասնավոր ընկերության աշխատակիցներին փրկելու համար, հայտնել է նրա վարչակազմը։
Leave a Reply