Ղազախստանում տեղի ունեցող դեպքերը կարող են ունենալ նաև թուրքական հետք․ Ռուբեն Մելքոնյան

Թուրքիայում պանթուրքիզմի քաղաքականությունը կամ թյուրքալեզու պետությունների, ժողովուրդների հանդեպ քողարկված օկուպացիոն քաղաքականությունը ունի պետական գաղափարախոսության կարգավիճակ։ Այս մասին Panorama.am-ի հետ զրույցում ասաց թուրքագետ Ռուբեն Մելքոնյանը՝ մեկնաբանելով Ղազախստանում տիրող իրավիճակը։

Թուրքագետը հիշեցրեց, որ Թուրքիայի ազգայնական կուսակցության ղեկավարը Թուրքիայի նախագահին հրապարակավ նվիրեց թյուրքական աշխարհի քարտեզ, որտեղ ընդգծված են Թուրքիայի հետաքրքրության տիրույթում գտնվող երկրները։ Ղազախստանն էլ դրանցից մեկն է և ունի կարևոր նշանակություն։

«Թուրքիան կենտրոնասիական պետությունների և թյուրքական ժոովուրդներով բնակեցված տարածքների հանդեպ իրականացնում է սողացող պանթուրքիզմի քաղաքականություն։ Պարզ է, որ Ղազախստանում այս դեպքերն ուղղակի կամ անուղղակի կարող են ունենալ նաև թուրքական հետք»,- ընդգծեց թուրքագետը։

Մելքոնյանի խոսքով ՝ Խորհրդային Միության փլուզումից հետո Թուրքիան հետխորհրդային երկրներում, ներառյալ՝ Ղազախստանում իրականացրել է մշակութային, կրթական և տնտեսական ծրագրեր։
«Այսինքն՝ այդ երկրներում ակնհայտ է թուրքական կրթական, տնտեսական և քարոզչական ներկայությունը։ Հիմնական նպատակն է այդ երկրներում հասարակությունների շրջանում պանթուրքիզմի, Թուրքիայի հանդեպ եղբայրական մոտեցումների ավելացումը։ Սրա աճն ուղիղ համեմատական է հակառուսականության աճին։ Այսինքն՝ որքան մեծ են պանթուրքիզմի տրամադրությունները հասարակության մեջ, նույնքան խորանում է հակառուսական քարոզչությունը։

Գաղափարախոսությունը հետևյալն է՝ պետք է թոթափել ռուսական  «օկուպացիան» և միավորվել թյուրքական պետություններով»,- ասաց թուրքագետն ու հավելեց․

«Ղազախստանում այս հուզումների մեջ Թուրքիան ունի հստակ շահագրգրվածություն՝  Ռուսաստանից «պոկելու»  կամ թուրքական ազդեցությունը մեծացնելու»։

Անդրադառնալով Ղազախստանում տիրող իրավիճակի ազդեցությանը Հայաստանի վրա՝ Մելքոնյանն ասաց, որ դրանք ուղիղ վտանգ են նաև Հայաստանի համար։ Նրա խոսքով՝ որքան պանթուրքիզմի գաղափարն ընդլայնվում է, այդքան այն սեղմվելու է Հայաստանի շուրջ։

«Օրինակ՝ «Զանգեզուրի միջանցք» կոչված գաղափարն աջակիցներ է ստանալու։ Եթե հիմա միայն Թուրքիան և Ադրբեջանն են, ապա  այդ գաղափարին միանալու են  թյուրքալեզու այլ պետություններ ևս, օրինակ՝ Ղազախստանը։ Այսինքն՝ սա  Հայաստանի շահերին ուղղակիորեն առնչվող խնդիր է»,- ասաց թուրքագետը։

https://www.panorama.am/am/news/2022/01/07/Ռուբեն-Մելքոնյան/2623513