ՈՒԱՇԻՆԿԹԸՆ.- Ամերիկայի Միացեալ Նահանգներու նախագահ Տոնըլտ Թրամփ Հայոց ցեղասպանութեան 104րդ տարելիցի կապակցութեամբ յայտարարութիւն մը հրապարակած է օգտագործելով «Մեծ Եղեռն» եզրոյթը: Կը ներկայացնենք «Արմէնփրէս»ի կողմէ կատարուած սոյն յայտարարութեան թարգմանուած բնագիրը.
«Այսօր մենք ոգեկոչում ենք Մեծ Եղեռնն ու բոլոր նրանց յիշատակը, ովքեր տառապել են 20րդ դարի ամենասարսափելի զանգուածային կոտորածների պատճառով: 1915 թուականից սկսած` Օսմանեան կայսրութեան վերջին տարիներին մէկ ու կէս միլիոն հայեր աքսորուեցին, սպանուեցին կ’ամ մահուան երթի դուրս եկան: Յիշատակի այս օրը մենք կրկին միանում ենք Ամերիկայի ու ողջ աշխարհի հայ համայնքին` սգալով բոլոր նրանց համար, ովքեր կորցրեցին իրենց կեանքը:
Այս օրը մենք նաեւ յիշում ու ճանաչում ենք բոլոր նրանց աշխատանքը, ովքեր փորձեցին վերջ տալ բռնութեանը, ինչպէս նաեւ նրանց, ովքեր ձգտեցին վստահեցնելու, որ նմանօրինակ կոտորածներն այլեւս երբեք չեն կրկնուելու, ինչպէս իրաւապաշտպան եւ իրաւաբան Ռաֆայէլ Լեմկինը: Մենք յիշում ենք նպաստներն այն մեծահոգի ամերիկացիների, ովքեր օգնեցին փրկելու կեանքեր եւ վերակառուցելու հայկական համայնքները: Յիշելով բոլոր նրանց, ովքեր տառապեցին, մենք նաեւ ոգեշնչւում ենք այն քաջ եւ տոկուն հայերից, ովքեր ի հեճուկս հսկայական դժուարութիւնների, կառուցեցին առոյգ համայնքներ ողջ աշխարհում, այդ թւում եւ Միացեալ Նահանգներում:
Մենք խոստանում ենք սովորել նախկին ողբերգութիւններից, որպէսզի չկրկնենք դրանք: Մենք ողջունում ենք հայերի ու թուրքերի ջանքերը` ճանաչելու եւ հաշուի առնելու իրենց ցաւալի պատմութիւնը: Մենք կանգնում ենք հայ ժողովրդի կողքին` յիշելու Մեծ Եղեռնի ընթացքում կորսուած կեանքերն ու վերահաստատելու աւելի խաղաղ աշխարհ կառուցելու մեր յանձնառութիւնը»:
Asbarez.com
Leave a Reply