Էրդողանը Հայոց ցեղասպանության տարելիցին շարունակեց թուրքական ժխտողականությունը

Հայոց ցեղասպանության 104-րդ տարելիցին Թուրքիայի նախագահ Ռեջեփ Թայիփ Էրդողանը հերթական անգամ ի ցույց ողջ աշխարհի առաջ տարավ թուրքական պատմագիտական–դիվանագիտական սուտն ու հերքեց հայերի դեմ իրականացված ոճրագործությունը:

Ինչպես հաղորդում է «Արմենպրես»-ը, թուրքական արխիվներին նվիրված գիտաժողովի շրջանակում, հանդես գալով ելույթով, Էրդողանը, անդրադառնալով Առաջին աշխարհամարտի տարիներին կատարվածին, հայտարարել է, թե հայերն են կոտորել մուսուլման կանանց և երեխաներին, ու նման պայմաններում «հայ հրոսակներին ու նրանց աջակիցների աքսորումն ամենատրամաբանական վարքագիծն է եղել»:

Չհեռանալով Հայոց ցեղասպանության հարցում ցուցաբերվող ավանդական թուրքական ժխտողականությունից՝ Էրդողանը հայտարարել է, որ իրենց արխիվներում կան մեծ թվով փաստական տվյալներ, և այդ տվյալները պետք է նախ ուսումնասիրեն հետազոտողները, և դրանից հետո միայն քաղաքական գործիչները հանդես գան հայտարարություններով:

Անդրադառնալով Ֆրանսիայի կողմից Հայոց ցեղասպանության վերաբերյալ դիրքորոշմանը՝ Էրդողանն ասել է. «Բոլոր նրանց, ովքեր հայկական հարցի շուրջ փորձում են մեզ մարդու իրավունքների վերաբերյալ դաս տալ, ամեն անգամ ստիպված ենք հիշեցնել նրանց արյունոտ անցյալը»:

Ապրիլի 24-ին՝ Հայոց ցեղասպանության տարելիցին Թուրքիայի առաջնորդի կողմից նմանօրինակ հայտարարությունների հնչեցումը վկայությունն է նրա, որ երկիրը շարունակում է հետևողական լինել պատմության և պատմական անհերքելի փաստերի ժխտման, սեփական անցյալն ուրանալու քաղաքական ժառանգությանը: Պետական մակարդակով հնչեցվող նման հայտարարությունները ոչ միայն լույս չեն սփռում այդ երկրի պատմության ամենամութ էջերի վրա, այլև շարունակում են գալիք սերունդների մեջ նոր թշնամանք ներարկել հայերի նկատմամբ:

https://armenpress.am/arm/news/972472.html

Էրդողանը նամակ է հղել Արամ Աթեշյանին

Թուրքիայի նախագահ Ռեջեփ Թայիփ էրդողանը նամակ է հղել Պոլսո Հայոց Պատրիարքական ընդհանուր փոխանորդ Արամ Աթեշյանին: Ինչպես հաղորդում է «Արմենպրես»–ը, նամակում Էրդողանը հերթական անգամ Օսմանյան Կայսրության կողմից ծրագրված և իրականացված Հայոց ցեղասպանությանը զոհ գնացած 1.5 միլիոն հայերին համարել է «Առաջին համաշխարհային պատերազմի զոհեր»:

Նամակում Էրդողանն ընդգծել է, որ «հարգանքի տուրք է մատուցում Օսմանյան Կայսրությունում Առաջին համաշխարհային պատերազմի տարիներին բարդ պայմաններում զոհված հայերի հիշատակին»:

Չնայած Թուրքիայում ազգային և կրոնական փոքրամասնությունների նկատմամբ շարունակվող ճնշումներին՝ Էրդողանը նշել է, որ Թուրքիայի հայկական համայնքի անվտանգությունն ու երջանկությունը շատ կարևոր են Թուրքիայի համար: Նա ասել է, թե «Թուրքիան շարունակելու է աջակցել հայերին՝ նրանց խնդիրները լուծելու համար»:

Էրդողանը հավելել է, որ Թուրքիայի հայերը՝ որպես իրավահավասար քաղաքացիներ, կարևոր դեր ունեն երկրի սոցիալական, քաղաքական և գործարար կյանքում:

https://armenpress.am/arm/news/972516.html