Թուրքիայի հայկական գյուղում կբացվի երկրի միակ հայկական թանգարանը

Թուրքիայի Հաթայ նահանգում գտնվող հայկական գյուղում՝ Վաքըֆլըում կբացվի Թուրքիայում առաջին հայկական թանգարանը։

Թուրքական Milliyet պարբերականի հետ զրույցում Վաքըֆլըի Հայ առաքելական եկեղեցու վաքըֆի նախագահ Ջեմ Չափարը նշել է, որ այս թանգարանը կապացուցի, որ հայերն ու թուրքերը ապրել են միասին և կարող են ապրել միասին։ Չափարը նշել է, որ թանգարանը Մշակույթի նախարարության կողմից հատուկ կարգավիճակ է ստացել և հավելել, որ Արևելյան միջերկրածովյան զարգացման գործակալությունը կաջակցի թանգարանի բացմանը։ Թանգարանը կցուցադրի Վաքըֆլըի մշակույթի, լեզվի, պատմության, խոհանոցի, պարերի վերաբերյալ տեղեկություններ, գրում է Yerkir.am-ը։

Վաքըֆլըի հայկական եկեղեցու վանահայր Ավեդիս Թաբաշյանը նշելով, որ մինչև 1939 թ. Հաթայը եղել է Ֆրանսիայի իշխանության տակ, հավելել է, որ Մուսա լեռան ստորոտին Վաքըֆլըի պես 6 գյուղ է եղել, սակայն Հաթայի երկրամասի՝ Թուրքիային միանալուց հետո շրջանի հայերի մի մասը գաղթել է երկրամասից, մի մասն էլ տեղափոխվել է Վաքըֆլը. «Վաքըֆլըում 35 հայ ընտանիք է ապրում, սակայն մեծամասնությունը արտասահմանում է։ Մեր գյուղում գրագիտության մակարդակը 99 տոկոս է։ Եկեղեցում պատարագները հայերեն ենք մատուցում։ Գյուղն ունի յուրահատուկ լեզու։ Այստեղ բնակվողները գիտեն և արևելահայերեն, և արևմտահայերեն, բայց արաբերեն և հայերեն խառնուրդով պարպարը (բառբառ ) մեզ հատուկ լեզուն է։ Այստեղ բոլորը գիտեն այդ լեզուն». – նշել է Թաբաշյանը։

Yerkir.am