Անցյալ շաբաթ Մասաչուսեթսի Ներկայացուցիչների պալատը հարգել է Հայոց ցեղասպանության զոհերի հիշատակը: «Մենք այստեղ ենք ցեղասպանությունը հիշելու համար», – ասել է սենատոր Ուիլյամ Բրաունսբերգերը:
Արդեն 34 տարի նահանգի պետական պաշտոնյաները խորհրդարան են հրավիրում հայերին եւ իրավապաշտպաններին ամենամյա արարողությանը, որը կոչված է ընդգծել Հայոց ցեղասպանության միջազգային ճանաչման կարեւորությունը, հաղորդում է Armenian Weekly-ը:
Իր ելույթում Միդլսեքս շրջանի շերիֆ Փիթեր Քութուջյանը մասնավորապես կիսվել է իր տատիկների եւ պապիկների պատմությամբ, որոնք կարողացել են Ցեղասպանության ժամանակ ապաստան գտնել Ամերիկայում:
«Ցեղասպանության պատմությունը մարդկային ողբերգությունների, քաջության, բարեգործության եւ հումանիտար օգնության պատմություն է», – նշել է ձեռնարկատեր եւ հայտնի բարերար Նուբար Աֆեյանը:
Իր հերթին, Մասաչուսեթս նահանգի օրենսդիր մարմնում միակ հայ պատգամավոր Դավիթ Մուրադյանը նշեց, որ այդ օրը հիշեցում է 1915 թ. ողբերգական իրադարձությունների մասին: «Շատ կարեւոր է, որ մենք շարունակենք հարգել մեր նախնիների հիշատակը», – ասաց Մուրադյանը:
Leave a Reply