Միություն ընդդեմ Ցեղասպանության կազմակերպության թուրք անդամները Հայոց ցեղասպանության զոհերի հիշատակն այս տարի իրենց երեխաների հետ միասին կհարգեն. նրանք հանդիպում կունենան հայ պատգամավորների հետ

Ամեն տարի Հայոց ցեղասպանության տարելիցի օրը` ապրիլի 24-ին, Հայաստան այցելող Միություն ընդդեմ Ցեղասպանության կազմակերպության (Soykırım Karşıtları Derneği / Verein der Völkermordgegner) թուրք և քուրդ անդամներն այս տարի Ծիծեռնակաբերդի հուշահամալիրում կգտնվեն իրենց երեխաների հետ մեկտեղ: Այդ մասին հաղորդում է Akunq.net-ը:

Աղբյուրի համաձայն` 1999 թ. Ֆրանկֆուրտում ստեղծված սույն միության անդամները 20 տարի շարունակ ամեն ապրիլի 24-ին Գերմանիայից այցելում են Հայաստան և ծաղկեպսակ դնում Հայոց ցեղասպանության զոհերի հուշարձանին` այդպիսով հարգանքի տուրք մատուցելով Մեծ եղեռնի նահատակներին:

Առաջին անգամ 1999 թ. այդ նպատակով Երևան այցելած միության անդամները որոշել են, միության 20-ամյակի կապակցությամբ, այս անգամՀայաստան գալ իրենց զավակների հետ միասին:

Իրենց միության հիմնադրման դեռևս 5-րդ տարելիցին նրանք հանդես էին եկել «Ճշմարտությունը պատմելու ենք մեր երեխաներին» կարգախոսով: Միության հիմնադիրներն ու անդամները, հավատարիմ մնալով այդ կարգախոսին, այս անգամ Ծիծեռնակաբերդ կայցելեն իրենց երեխաների հետ մեկտեղ:

Միության պատվիրակությունն այս տարի բաղկացած կլինի 19 հոգուց և Երևանում կգտնվի ապրիլի 20-27-ը:

Միություն ընդդեմ Ցեղասպանության կազմակերպության այս տարվա ծրագրով նախատեսված է նաև այց ՀՀ խորհրդարան և հանդիպում հայ պատգամավորների հետ:

Մելինե Անումյան

Akunq.net