Մարտի 30-ին Սոֆիայի «Նաիրի» պարախումբը բուլղարական «Էստրեյա» բալետային խմբի հատուկ մասնակցությամբ կրկին մեծ հաջողությամբ ներկայացրեց «Ճանապարհ»պարային ու պոետիկ բեմադրությունը: Պարարվեստի և Անահիտ Չալյովսկայի բանաստեղծությունների միջոցով, հենվելով իրական դեպքերի ու հուշերի վրա` ցուցադրվեց մի հայ ընտանիքի կյանքի պատմությունը 1915 թվականի Հայոց ցեղասպանության օրերին:
Ինչպես «Հայերն այսօր»-ին հայտնում է Գոհար Խնկանոսյանը, բեմադրության հիմքում մի տատիկի պատմությունն է թոռնիկներին՝ իր և իր ընտանիքի վերապրած օրերի մասին: Ներկայացման ընթացքում ազդեցիկ չափածոն և ներդաշնակ պարերը ուղեկցվում են համապատասխան դրվագներով: «Ուզունդարա», «Նազանի», «Կուժերով պար», «Հարսնացուի պար», «Հովիվների խաղը», «Շալախո» պարերը ներկայացնում են խաղաղ ու անհոգ կյանքը Հայրենիքում: «Ադանա» և «Քաոս» պարերը պատկերում են Ցեղասպանության դաժան օրերը: Ապա հաջորդում են հյուրընկալ բուլղար ժողովրդի ազգային պարերն ու հայկական ուրախ «Ղափաման»:
«Նաիրի»-ի 7-9 տարեկան պարողները հանդես եկան «Գարնանային ծաղիկներ» պարով և մասնակցեցին «Ղափամա»-ին: Համերգի ավարտին համատեղ կատարվեց «Բերդ» պարը:
«Նաիրի» հայկական պարախմբի գեղարվեստական ղեկավար Էմմա Շահինյան-Պալովան քառասունից ավելի պարողների միջոցով հանդիսատեսին ներկայացրեց պարային մոտ 20 տարբեր տարազ, որոնցից մի քանիսը Հայաստանի վարպետների ձեռքի աշխատանքն են, իսկ մյուսները պատրաստել են բուլղարահայ դերձակները:
Ներկաները դահլիճից հեռացան հիացած և ոգեշնչված՝ ակնկալելով նորանոր ելույթներ ու հրաշալի տպավորություններ: Մեծ հաջողություն ունեցող ներկայացումը նախատեսվում է ցուցադրել նաև Բուլղարիայի այլ քաղաքներում:
Leave a Reply