Թուրքիայի տարածքը միայն այս 780.000 ք/քմ-ն չէ. երկրի փոխվարչապետ

Թուրքիայի տարածքը միայն 780.000 ք/կմ տարածքը չէ: Այս մասին Ստամբուլի Էսենլեր թաղամասի մշակութային կենտրոնում կազմակերպված առաջին բանակային բյուրոկրատների հանդիպման ժամանակ նշել է Թուրքիայի փոխվարչապետ Նուման Քուրթուլմուշը:

Նրա խոսքով՝ Թուրքիան հուլիսյան հեղաշրջման փորձից առաջ մի երկիր էր, իսկ դրանից հետո՝ մեկ այլ երկիր. «Ընդհանուր խորապատկերում մեր առջեւ մեկ այլ պատկեր է երեւում: Թուրքիայի առջեւ ծառացած մարտահրավերները, այդ թվում պետական հեղաշրջման փորձը, PKK-ի եւ ԻՊ-ի դեմ պայքարը, ահաբեկչական հարձակման տակ գտնվելը ամբողջացնում են այդ պատկերը: Մեր տարածաշրջանում ընթացող խաղը հասկացող, այդ խաղին առերեսվելու ունակ, պատմական արմատներ ու քաղաքական փորձ ունեցող միակ երկիրը Թուրքիան է եւ որպեսզի հնարավորություն չընձեռեն Թուրքիային վերջ դնել այդ խաղերին, հարկավոր է, որ թույլ չտան, որ նա դառնա մեծ ու հզոր երկիր: Թուրքիայում բոլոր հեղաշրջումների գլխավոր պատճառը սա է»,-ընդգծել է փոխվարչապետը:

Նրա խոսքով՝ «Ուժեղ ու հզոր Թուրքիա» ասվածի հիմքում հիմնական սյուներն են՝ պետության եւ ժողովրդի մերձեցում, Թուրքիայի՝ իր արմատների եւ պատմության  հետ համերաշխություն, Թուրքիայի քաղաքական ու տնտեսական կայունությունը:

Նուման Քուրթուլմուշը հայտարարել է, որ Թուրքիան միայն 780 հազար ք/կմ-ն չէ. «Մենք սա չենք ասում, որ մեր սահմաններն ընդլայնենք, սակայն Թուրքիան ունի նաեւ հոգեւոր եւ ընդլայնված աշխարհագրություն, որը շարժվում է մշակութայնորեն ընդհանուր զգացումներով: Այդ մշակույթներից ոմանց հետ հարազատներ ենք, ոմանց հետ՝ թշնամիներ, ոմանց հետ՝ կրոնակից ու ազգակից: Այս աշխարհագրությունում մենք ունենք մոտ 1,5 մլրդ-անոց աշխարհագրություն եւ դրան գումարած 1,7 մլրդ-անոց իսլամական աշխարհը, որի հետ նույն զգացումներն ունենք:

Հոգեւոր այս աշխարհագրությունում գոյություն ունեցող մեր հարաբերությունները գնալով ավելի ամրապնդելու հնարավորությունը ոմանց երազները հոդս է ցնդեցնում: Ոմանց մոտ էլ այդ հնարավորության պատճառով վախի ճգնաժամ է առաջանում: Մեր առջեւ առկա պատկերը սա է: Նրանք չեն ուզում, որ Թուրքիան լինի մեծ եւ ուժեղ երկիր, բայց մենք հակառակն ենք անելու, իսկ դրա ճանապարհը միասնությունն է եւ մեր հզոր քաղաքակրթությունը կերտելը»:

https://news.am/arm/news/358871.html