Թուրքիայում ոստիկանությունը ձերբակալել է Մարդինի քաղաքապետ Ահմեթ Թյուրքին: Այս մասին գրում է ՌԻԱ Նովոստին՝ վկայակոչելով NTV հեռուստաալիքը:
Քաղաքապետարանի շենքում խուզարկություն է կատարվում: Ձերբակալված քաղաքապետը նախկինում ղեկավարում էր քրդամետ Դեմոկրատական հասարակություն կուսակցությունը, իսկ հիմա Տարածաշրջանների դեմոկրատական կուսակցության անդամ է, որին Թուրքիայի իշխանությունները մեղադրում են երկրում արգելված Քրդական աշխատավորական կուսակցության հետ կապ ունենալու մեջ:
Ավելի վաղ թուրքական իշխանությունները հայտարարել էին երկրի հարավ-արեւելյան շրջաններում տեղական վարչակազմերի 28 ղեկավարի պաշտոնանկ անելու որոշման մասին՝ ՔԱԿ-ի հետ նրանց կապերի համար: Որոշումը կայացվել է հուլիսի 16-ին Թուրքիայում պետական հեղաշրջման փորձից հետո սահմանված արտակարգ դրության ռեժիմի շրջանակում:
Քրդամետ Ժողովուրդների դեմոկրատական կուսակցությունից բազմաթիվ պատգամավորներ եւ հիմնականում քրդերով բնակեցված մի շարք քաղաքների ղեկավարներ ձերբակալվել են, այդ թվում՝ Դիարբեքիրի եւ Վանի քաղաքապետերը, որոնց նույնպես թուրքական իշխանությունները մեղադրում են ՔԱԿ-ի հետ կապ ունենալու մեջ:
https://news.am/arm/news/358424.html
Leave a Reply