Եւրոմիությունը պետք է մտածի Թուրքիայի դեմ պատժամիջոցներ սահմանելու մասին՝ կապված պետական հեղաշրջման փորձից հետո ընդդիմադիր գործիչների եւ լրագրողների կալանավորումների ալիքի հետ: Այս մասին Bild am Sonntag-ի հետ հարցազրույցում հայտարարել է Եւրոխորհրդարանի նախագահ Մարտին Շուլցը:
«ԵՄ-ում, մենք պետք է մտածենք, թե Թուրքիայի նկատմամբ տնտեսական ինչպիսի պատժամիջոցներ կարող ենք կիրառել: Այս տարեվերջին պետք է իրականացվի [ԵՄ] Մաքսային միության բարեփոխումը, որի անդամ է Թուրքիան: Ես չեմ պատկերացնում, որ ընդդիմադիր պատգամավորների եւ լրագրողների կալանավորումներից հետո մենք պետք է Մաքսային միությունն ընդլայնենք»,- հայտարարել է Շուլցը:
Դրանից զատ, Եւրոխորհրդարանի նախագահը հիշեցրել է մահապատիժ մտցնելու հարցի հանդեպ ԵՄ-ի դիրքորոշումը: «Եթե Թուրքիան մահապատիժը վերականգնի, [ԵՄ-ին] անդամակցելու բանակցությունները կավարտվեն»,- պարզաբանել է Շուլցը՝ հավելելով, որ հանդես է գալիս երկրի հետ երկխոսությունը շարունակելու օգտին:
Leave a Reply