Ուքրանիոյ խորհրդարանին մէջ աւելցած է Հայոց Ցեղասպանութեան ճանաչման կողմ պատգամաւորներուն թիւը

Հայոց ցեղասպանութիւնը ճանչցող բանաձեւի ընդունման կողմ ուքրանացի խորհրդարանակններուն թիւը երթալով կ՛աճի:

Տարբեր խմբակցութիւններէ պատգամաւորներ միացած են պատգամաւոր Վիթալի Պարուինենքոյի` Հայ ժողովուրդի ցեղասպանութեան ճանաչման մասին օրէնսդրական նախաձեռնութեան: Այդ մասին կը հաղորդէ Genocide.org.ua-ն:

Համաձայն աղբիւրին տեղեկատուութեան` 2015 թուականի ապրիլի 3-ին արձանագրուած Հայոց ցեղասպանութիւնը ճանչցող բանաձեւի ընդունման նախաձեռնութեան միացած են «Վերածնունդ» կուսակցութենէն պատգամաւոր Տմիթրի Սուեատաշը, «Ընդդիմադիր պլոք»-էն` Միխայիլ Տոպքինը եւ Տմիթրի Տոպքինը:

Աւելի առաջ բանաձեւի ընդունման իրենց աջակցութիւնը յայտնած էին պատգամաւորներ`«Ընդդիմադիր պլոք»-էն Վատիմ Նովինսքին, «Վերածնունդ» կուսակցութենէն` Ալեքսանդր Փրեսմանը, «Պեոթր Փորոշենքոյի պլոք»-էն` Դաւիթ Մակարեանը, «Ազգային ճակատ»-էն` Նիքոլայ Կնեաժիցքին, Իրինա Եւրեմովան, Իկոր Պրիչենքոն, Անաթոլի Տիրիւը, Կենադի Կրիւոշյան, Ալեքսանդր Քիրշը, Իկոր Քոտուիցքին, Վատիմ Փիտպերեզնեակը, Վալերի Լունչեքնոն:

Ուքրանիոյ հայերու միութեան նախագահ Վիլեն Շատուորեանը ընդգծած է. «Մենք շնորհակալ ենք Ուքրանիոյ ժողովրդական պատգամաւորներուն` արդարութեան հաւատարիմ ըլլալու համար»:

2013 թուականի յունիս 6-ին Ուքրանիոյ Գերագոյն Ռատայի մէջ արձանագրուած էր 1915 թուականին Օսմանեան կայսրութեան մէջ Հայոց ցեղասպանութեան ճանաչման նախագիծ: Օրինագիծի նախաձեռնողներն էին այն ժամանակ պատգամաւորներ` Վիլեն Շատուորեանը, Արսէն Աւաքովը եւ Նուէր Մխիթարեանը:

http://www.yerakouyn.com/?p=120332