Թուրքական «Հյուրիյեթ» թերթը հրապարակել է Թուրքիայի 10 ամենագեղեցիկ գյուղերի ցուցակը, որում տեղ են գտել նաև մի շարք հայկական գյուղեր:
Առաջինն աչք է զարնում Էրզինջանի (պատմական Երզնկա) հայկական Ապչաղա գյուղը: Թուրքիայում շատերն անգիր գիտեն Ահմեթ Կուցի Թեջերի հեղինակած «Այնտեղ հեռվում մի գյուղ կա» բանաստեղծությունը, որը նվիրված է հենց Ապչաղային: Սակայն քչերը գիտեն, որ գյուղի իսկական հայկական անունն Աբուջեղ է, այս մասին լռել նախընտրեց նաև «Հյուրիյեթ»-ը: Ասում են՝ բարձր լեռնային այս գյուղից է բացվում դեպի Եփրատ գետ ամենագեղեցիկ տեսարաններից մեկը:
«Հյուրիյեթ»-ն անդրադարձել է նաև հայկական Վագըֆ (թուրքերեն Վաքըֆլը) գյուղին, որը պաշտոնապես գրանցված է որպես Թուրքիայի տարածքում միակ հայկական քրիստոնեական գյուղը: Թերևս, այս փաստը թույլ է տվել թերթին համարձակորեն նշել գյուղի հայկական լինելը: Գյուղն ունի իր եկեղեցին և հյուրանոցը: Կիլիկիայի վերջին հայաբնակ գյուղը համարվող Վագըֆի մասին թուրքական թերթը գրում է. «Նարնջի և կիտրոնի իր ծառերով առանձնահատուկ գեղեցկության մեջ ընկղմված Վաքըֆլը գյուղում կարող եք ծանոթանալ հայկական մշակույթին և ճաշակել տեղական խոհանոցի համերը»: Նշվում է, որ գյուղում դեռևս ապրում է մոտ 80 հայ:
Ցուցակում կարելի է նկատել նաև համշենական Մարալ գյուղը, որը գտնվում է Արդվինի զմրուխտապատ լեռներում: Գյուղի ամենահայտնի տեսարժան վայրն է Մաջահել կոչվող ջրվեժը: Այստեղ պահպանվել են հին համշենական փայտե տնակները և խիտ անտառները: Ինչպես նշում է թերթը՝ մարդկային ձեռքը դեռևս չի դիպել Մարալի բնությանը:
http://www.tert.am/am/news/2016/11/07/armenians-in-turkey/2185588
Leave a Reply