Ստամբուլում գործող հայկական «Արաս» հրատարակչությունը լույս է ընծայել Անդրանիկ Ծառուկյանի «Մանկություն չունեցած մարդիկ» գրքի թուրքերեն թարգմանությունը: Գիրքն արդեն տեղ է գտել «Արաս»-ի պաշտոնական կայքում:
Գիրքն առաջին անգամ հրատարակվել է 1955թ., Բեյրութում և պատմում է Ցեղասպանության տարիներին Դեր Զորի ճանապարհով Հալեպ հասած մանկահասակ հայ որբերի և նոր գաղթավայրում նրանց ապրած դժվարությունների մասին:
«Իրենց հասակից մեծ գործեր ձեռնարկող և կյանքից իրենց հասանելիք ամենամեծ բաժինը պոկել աշխատող այդ որբերի մոտ չքավորության ու ոչ մի հարազատ չունենալու զգացողությունը հասնում էր մինչև ոսկրածուծ, սակայն դա նրանց չէր խանգարում ապրել մի աշխարհում, որի օրենքները հենց նրանք էին սահմանել»,- գրքի նկարագրության մեջ այսպես է ներկայացրել Ծառուկյանի ստեղծագործությունն «Արաս» հրատարակչությունը:
«Արաս» հրատարակչությունը հիմնադրվել է Ստամբուլում 1993թ.: Հրատարակչությունը կարճ ժամանակում կարողացել է շատերի համար դառնալ «պատուհան»` դեպի հայկական գրականություն, քանի որ զբաղվում է հայ դասականների, հայերի պատմության և Հայոց ցեղասպանության վերաբերյալ բազմաթիվ գրքերի թուրքերեն թարգմանությամբ՝ այն հասանելի դարձնելով թուրքական հասարակության բոլոր խավերին:
Հրատարակչությունն ունի նաև արևմտահայերենով հրատարակված գրքեր:
Leave a Reply