Թուրքիա–Հայաստան սահմանին գտնվող Անին գրավում է տարբեր մասնագիտությունների տեր անձանց ուշադրությունը: Այս մասին հայտնում է թուրքական «Sondakika» լրատվական կայքը՝ ներկայացրելով քաղաքի պատմությունը պղնձի դարից մինչև մեր օրերը:
Ուշագրավ է, որ կայքը քաղաքի պատմությունը սկսելով Ք.ա 5000-3000 թթ-ից, ոչ մի ժամանակաշրջանում չի հիշատակում «հայ» բառը:
Նշվում է, որ վերջին շրջանում Անին եղել է խիստ վերահսկվող ռազմական արգելված գոտի: Արգելքի վերացումից հետո այն հայտնվել է զբոսաշրջիկների ուշադրության կենտրոնում: Կայքը հայտնում է, որ ավերակների վերածված պատմական վայրերի ցանկում Անին ամենակարևորներից մեկն է դարձել: Կարսի շրջան այցելող տարբեր բնագավառի ներկայացուցիչներ՝ պատմաբան, լրագրող, հնէաբան թե լուսանկարիչ, այցելում և շրջում են Անիում, որը կախարդում է հյուրերին իր պատմական հուշարձաններով:
Վերջերս Անիում լուսանկարչական ծրագրի շրջանակներում Կարսի Կովկաս համալսարանի ուսանող Մուհամմեդ Ալի Գյոքչեքը, Աթաթուրքի անվան համալսարանի լրագրության բաժնի ուսանող Դույգու Գյոքթյուրքը, պրոֆեսինոալ պարող Օմուրջան Յըլդըզը ներկայացում էին կազմակերպել: Անին նաև գիտնականների ուշադրության կենտրոնում է, որոնք քաղաքի մասին հոդվածներ են տպագրում գիտական ամսագրերում:
Հիշեցնենք, որ Բագրատունիների թագավորության մայրաքաղաք Անին 2016թ. ՅՈՒՆԵՍԿՕ-ի Մշակութային ժառանգության կոմիտեի 40-րդ նիստում ընդգրկվել է ՅՈՒՆԵՍԿՕ-ի համաշխարհային մշակութային ժառանգության ցանկում:
http://www.ermenihaber.am/am/news/2016/10/24/Sondakika-%D4%B1%D5%B6%D5%AB/92209
Leave a Reply