Վերջին շրջանում կտրուկ ավելացել է Թուրքիայից արտագաղթող կրոնական փոքրամասնությունների, այդ թվում՝ հայերի թիվը

Թուրքիայում վերջին խորհրդարանական ընտրություններից, թուրք-քրդական բախումների վերսկսումից և հուլիսի 15-ի հեղաշրջման փորձից ի վեր տեղի ունեցող զարգացումներն ու օր օրի շատացող ահաբեկչական հարձակումները բարդ դրության մեջ են դրել հատկապես Թուրքիայի կրոնական փոքրամասնություններին, գրում է «Ակօսը»: 
«Ակօսի» փոխանցմամբ` միայն վերջին շաբաթում Թուրքիան լքել է 250 հրեա:
Թեև Թուրքիան լքող հայերի թիվը դեռ չի հասել նման մասշտաբների, սակայն անհնար է չնկատել համայնքի ներսում կրկին գլուխ բարձրացրած վախերն ու երկրից հեռացող կամ հեռանալ ցանկացող հայերի թվի կտրուկ աճը, գրում է լրատվամիջոցը։
Թերթը նշում է, որ արտագաղթողները հիմնականում բռնում են Եվրոպայի ուղին:
Ընդամենը երկու շաբաթ առաջ Թուրքիայից Եվրոպա տեղափոխված մի հայ նշում է, որ Թուրքիայի հայերի համար հեշտ չէ պատմական հողերը լքելու մասին որոշում կայացնել, սակայն վերջին տարում տեղի ունեցող զարգացումները շատ հայերի ստիպում են նման որոշում կայացնել:
«Հեշտ չէ թողնել ու գնալ ծննդավայրդ, թաղամասդ, որը 5 մատի պես գիտես: Եթե կայացրել եք այդ որոշումը, ուրեմն վստահաբար լուրջ պատճառներ ունեք: Մեր դեպքում ամենակարևոր պատճառը մեր երեխային առնվազն 5 սերունդ հանգստություն չտեսած Թուրքիայի փոխարեն ավելի քաղաքակիրթ պայմաններում մեծացնելն է: Մեր շրջապատում շատ են Թուրքիան լքելու որոշում կայացրածները: Մեր հեռանալու իրական պատճառները մեր վախերն են: Հնարավորություն ունեցողները գնացին, իսկ նրանք, ովքեր չունեն դրա հնարավորությունը, ապրում են՝ մտածելով, թե ամենավատ պարագայում ի՞նչ պետք է անեն»,- պատմում է ստամբուլահայ գաղթականը:

http://www.tert.am/am/news/2016/10/20/armenians-in-turkey/2169062