Մատենադարանից Ախալցխայի Ծուղրութ գյուղ ժամանած մասնագետները նորոգման աշխատանքներ են իրականացնում 974 թ. հայտնի Ծուղրութի Ավետարանի վրա: Ավետարանը պահող Սարգիս Սապոնջյանի խոսքով` ձեռագիր մատյանը գտնվում է շատ լավ վիճակում, եւ անգամ մասնագետները զարմացած են, թե որքան լավ է այն պահպանվել:
«Մասնագետները, արդեն 9-րդ օրն է, ինչ աշխատում են: Դրա համար հատուկ լաբորատորիա են բերել եւ մնալու են եւս չորս օր: Ավետարանը, ինչ տեղափոխվել է Էրզրում քաղաքից, չի վերանորոգվել: Ինչքան գիտեմ, վերանորոգվել էր միայն Ավետարանի արծաթե կողը»,- Akhaltskha.net-ի փոխանցմամբ՝ ասում է Սարգիս Սապոնջյանը:
Ծուղրութի Ավետարանը պարունակում է Աստվածաշունչ մատյանի Նոր կտակարանի չորս Ավետարանները։ Ընդօրինակվել է 974 թ.։ Գրչության վայրը և մանրանկարիչը հայտնի չեն։ Գրիչը Հովհաննեսն է, հիշատակարանի հեղինակը և ձեռագրի ստացողը՝ Եղյա քահանան։ Ձեռագիրն այժմ գտնվում է Վրաստանի Ախալցխայի շրջանի Ծուղրութ գյուղում։
«Ծուղրութի Ավետարանը» հայ միջնադարյան արվեստում նշանակալից է նախ՝ հնագրության և ապա՝ մանրանկարչության առումով։ Հիսուսի կյանքը պատկերող թեմատիկ մանրանկարաշարը հետաքրքրական է պատկերագրության հնամենի առանձնահատկություններով։
Hayernaysor.am
Leave a Reply