Սիբիլի հայրենասիրական երգերի ցանկը համալրվեց ևս մեկով` «Վանա լճին» երգով

Պոլսահայ երգչուհի Սիբիլի հայրենասիրական երգերի ցանկը համալրվեց ևս մեկ գեղեցիկ ստեղծագործությամբ: «Վանա լճին» կոչվող երգը զրույց է պատմական հայրենիքի խորհրդանիշի հետ ու աշխարհասփյուռ հայության կարոտի և հույզերի արտահայտումն է՝ հոգևոր հայրենիքի հանդեպ:

Նախօրեին երգը և տեսահոլովակը ներկայացվել է հայ հանդիսատեսի դատին:

«Պատասխան 100 տարի անց» ծրագրի շրջանակներում՝ Արևմտյան Հայաստան կատարված ուխտագնացության տպավորությունների ներքո գրված երգի հեղինակը Հասմիկ Հախվերդյանն է:

«Յուրաքանչյուր հայ իր սրտում ունի Վան, Արևմտյան Հայաստան,- նկատել է տալիս Հասմիկ Հախվերդյանը: –  Յուրաքանչյուրս իր մեջ պահում է այդ կարոտը, ուստի կարծում եմ, որ երգը հոգեհարազատ է բոլորիս»:

Հախվերդյանը նշում է, որ Սիբիլը որպես Ստամբուլում ապրող և այնտեղ հայի գոյությունը շարունակող երգչուհի, կարծես հանդիսանում է Արևմտյան Հայաստանի խորհրդանիշ, ուստի կարևոր էր, որ հենց ինքը կատարեր այս երգը:

«Երբ Հասմիկն ինձ ուղարկեց երգը, և ես առաջին անգամ լսեցի այն, մարմինս փշաքաղվեց: Միանգամից հասկացա, որ սա իմ երգն է»,- ասում է Սիբիլը:

Պոլսահայ երգչուհին «Ermenihaber.am»-ի հետ զրույցում հույս հայտնեց, որ երգի հայաստանյան պրեմիերայից հետո հնարավորություն կունենա այն ներկայացնել նաև Թուրքիայում:

«Վերադառնալուն պես կզբաղվեմ այդ հարցով: Անպայման կուզեմ, որ այս երգը հայտնվի նաև թուրքական հեռուստաալիքների եթերում», – նշում է երգչուհին:

Դաշնամուրի ու թավջութակի նվագակցությամբ Սիբիլի նուրբ ու հուզական կատարմամբ երգի տեսահոլովակը նկարահանվել է Սևանա լճի ափին: Տեսահոլովակի ռեժիսորը Մարիամ Գևորգյանն է, իսկ պրոդյուսերը ՝ Անդրե Սիմոնյանը:

http://www.ermenihaber.am/am/news/2016/10/15/%D5%BD%D5%AB%D5%A2%D5%AB%D5%AC-%D5%8E%D5%A1%D5%B6%D5%A1-%D5%AC%D5%B3%D5%AB%D5%B6/91588