Թուրքիայում մի շարք ալևիական հիմնադրամներ մերժել են նախագահ Ռեջեփ Թայիփ Էրդողանի և վարչապետ Բինալի Յըլդըրըմի կողմից ընթրիքի հրավերները, գրում է թուրքական Diken.com.tr կայքը:
Այս ամիս ալևիների մոտ ավանդական պահքի շրջանում (ալևիների մոտ այս ամիսը համարվում է սրբազան «Մուհարրեմի» ամիս, որի ընթացքում նրանք պահք են պահում) նախագահն ու վարչապետն իֆթարի են (իֆթարը մահմեդականների մոտ պահքի շրջանում երեկոյան ուտելիքն է) հրավիրել ալևիական համայնքի մի շարք ներկայացուցիչների, մինչդեռ վերջիններս չեն ներկայացել:
Ալևիների մերժման պատճառով Բինալի Յըլդըրըմի կողմից մատուցվող իֆթարի ընթրիքը չեղյալ էր համարվել օրեր առաջ: Իսկ ահա նախագահ Էրդողանի կողմից կազմակերպված իֆթարի ընթրիքի սեղանների շուրջ ներկա էին ոչ բոլոր ալևիական հիմնադրամների ներկայացուցիչները: Շատերը, բոյկոտելով միջոցառումը, չեն ներկայացել:
Ընթրիքների հրավերները մերժած ալևիները հայտարարել են, որ տարվա մեջ մի անգամ ալևիների պահքի ժամանակ ընթրիք կազմակերպելով և նրանց հետ լուսանկարվելով՝ իշխանության ներկայացուցիչները չեն կարողանա լուծել ալևի համայնքի մի շարք խնդիրներ:
Նշենք, որ ալևիները, որոնք հիմնականում բնակվում են Սիրիայի հյուսիս-արևմտյան և հարավային Թուրքիայի լեռնային շրջաններում, Թուրքիայում պաշտոնապես համարվում են իսլամի շիա ուղղությանը դավանող համայնք, մինչդեռ մի շարք ալևիների կողմից այս տեսակետը չի ընդունվում: Ոմանք պնդում են, որ ալևիզմը, որին դավանում են միլիոնավոր քրդեր, զազաներ և թուրքեր, առանձին կրոն է, որն իր մեջ սինթեզում է մահմեդակականության, քրիստոնեության և անգամ հեթանոսության որոշ բարքեր: Ալևիներն իրենք իրենց հաճախ նաև անվանում են «քըզըլբաշ»: Բազմաթիվ պատմաբաններ դեռևս չեն գտնում ալևիների ծագման և կրոնական ինքնության հետ կապված մի շարք հարցերի պատասխանները:
Leave a Reply