Պոլսահայ լրագրող, Ստամբուլի հայ համայնքի թերթերից «Ակօս»-ի հիմնադիր և գլխավոր խմբագիր Հրանտ Դինքի սպանության գործով դատական նոր նիստին ցուցմունք են տվել Տրապիզոնի նախկին ոստիկանապետ Ալի Ֆուաթ Յըլմազերն ու հետախուզության շտաբի նախկին ղեկավար Ռամազան Աքյուրեքը, ինչպես նաև այժմ Թուրքիայի հետախուզության գլխավոր շտաբի ղեկավար, Տրապիզոնի հետախուզական շտաբի նախկին պետ Էնգին Դինչը: Այս մասին գրում է թուրքական «Էվրենսել» պարբերականը:
Հայտնի է, որ Էնգին Դինչն իր ցուցմունքի ժամանակ հայտնել է, որ Դինքի մահվան մասին նա իմացել է հեռուստատեսությունից և շատ է ցավում պատահածի համար:
«Հրանտ Դինքի դեպքն իսկապես շատ տխրեցնող է: Ուզում եմ իմ ցավակցությունը հայտնել փաստաբաններին և Դինքի ընտանիքին»,- ասել է Դինչը:
Նա նշել է, որ Տրապիզոնի հետախուզության շտաբի պետի պաշտոնից ազատվել է Դինքի սպանությունից 6 ամիս առաջ, և խոստովանել է, որ պաշտոնին գտնվելու ընթացքում աշխատել է սպանությունը կանխարգելող միջոցառումների խափանման ուղղությամբ:
Նշենք, որ Ռամազան Աքյուրեքը Դինքի սպանության գործի շրջանակում ձերբակալվել է 2015թ. փետրվարի 26-ին՝ Անկարայում: Աքյուրեքի անունը շեշտվել է նաև օրեր առաջ Դինքին սպանած Օգյուն Սամասթի կողմից՝ իր վերջին ցուցմունքի ժամանակ:
Նիստի ընթացքում «Չաղլայան» արդարադատության պալատի դիմաց հավաքվել էին Դինքի սպանության գործով դատավարությանն ակտիվ հետևող ակտիվիստներ, որոնց թվում են նաև հայազգի լրագրող Հայկո Բաղդատը, Թուրքիայի ժողովրդադեմոկրատական կուսակցության անդամ, պատգամավոր Կարո Փայլանը և «Ակօս»-ի լրագրողներ:
Ցույցի ընթացքում ելույթ է ունեցել լրագրող Բանու Գյուվենը:
«Ծանր օրեր ենք ապրում, մեր ձայնը կտրում են, տեղեկատվություն ստանալու մեր բոլոր ճանապարհները փակում են: Օր օրի քչանում են այն ԶԼՄ-ները, որոնք կարող են այսօր այս դատական դահլիճում տեղի ունեցող դատական նիստը լուսաբանել: Այս օրերին, երբ կրկին ծանր հարվածներ է ստանում խոսքի ազատությունը, մենք դարձյալ «Չաղլայան» արդարադատության պալատի դիմաց ենք՝ մեր համառությամբ և մեր հարցերով», – ասել է Բանու Գյուվենը:
Հիշեցնենք, որ շաբաթներ առաջ համացանցում հայտնվել էր մի տեսանյութ, որում Դինքի սպանության օրը երևում էր, թե ինչպես է մարդասպան Օգյուն Սամասթն իր քայլերն ուղղում դեպի «Ակօսի» խմբագրության շենք, այդ նույն տեսանյությում երևում են նույն տարածքում անհանգիստ այսուայն կողմ քայլող տղամարդիկ, որոնք, կարծես, նշան են տալիս Օգյուն Սամասթին:
Տեսանյութում երևացող տղամարդիկ, ըստ Ստամբուլի դատախազության պնդումների, թուրքական ԶՈՒ-ի նախկին սպաներ են, որոնք վերջերս ձերբակալվել են հուլիսի 15-ի հեղաշրջման փորձից հետո երկրում կատարվող կադրային զտումների և խուզարկությունների շրջանակներում:
Վեց սպաները, որոնք փաստացի արդեն մեղադրվում են Դինքի սպանության գլխավոր պատասխանատուն լինելու համար, կասկածվում են հուլիսի 15-ի հեղաշրջման փորձի կազմակերպման համար մեղադրվող Ֆեթուլլահ Գյուլենի կազմակերպության հետ կապերի և հեղաշրջման փորձին մասնակցություն ունենալու համար:
Leave a Reply