Դի–Վի–Վի միջազգային կազմակերպությունը ՀՀ–ում Գերմանիայի դեսպանության հետ համատեղ հանրության դատին հանձնեց Հայկ Մարտիրոսյանի «Գերմանական միսիոներական գործունեությունն Օսմանյան կայսրությունում. Մարաշի կայանը (1986-1919թթ.)» գիրքը:
Հեղինակի առաջին մենագրությունը մանրամասն եւ բազմակողմանի անդրադարձ է կատարում Մարաշի միսիոներական կայանի պատմությանը: Աշխատանքի երկրորդ հատվածը պատմում է Մարաշում գործունեություն ծավալած եւ անհայտ մնացած 40 աշխատակիցների կյանքն ու պատմությունը: Հայկ Մարտիրոսյանը երկար տարիներ է` ուսումնասիրում է այս թեման: Նրա խոսքով` աշխատության մեջ ներառված է ուսումնասիրված 200 միսիոներներից միայն մի մասի կյանքի պատմությունը:
«Այս թեմայով ատենախոսություն պաշտպանեցի, հետագայում շարունակեցի ավելի խորը ուսումնասիրել: Տեսնելով, որ նյութերը չափազանց շատ են եւ գերազանցապես գտնվում են գերմանական արխիվներում, եղա Գերմանիայում այս անգամ արդեն երկար ժամանակով, կատարեցի հետազոտություններ, այցելեցի գրադարաններ, ուսումնասիրեցի այդ ժամանակահատվածի գերմանական մամուլը` տասնյակ անուն թերթեր: Նպատակ կար բոլորի մասին գրելու եւ գերմանացի միսիոներների մասին հանրագիտարան կազմելու, սակայն նրանց թիվը շատ մեծ է` ներառյալ նաեւ նրանց, ովքեր գերմանացի չեն, սակայն գերմանական կազմակերպություններում են աշխատել: Այս գրքի համար ընտրեցի Մարաշի կայանը, որը վերապրել է Առաջին աշխարհամարտ, ցեղասպանություն»,-«Արմենպրես»-ի հետ զրույցում նշեց հեղինակը:
Նա տեղեկացրեց, որ արդեն իսկ պայմանավորվածություն կա եւս մեկ գիրք հրատարակելու մասին, որում նախատեսում է ներառել Վանի կայանի պատմությունը:
Armenpress.am
Leave a Reply