Դանիել Դեքերը խոստովանեց՝ դժվար է կատարել հայկական երգեր

Կոմպոզիտոր, երգիչ, երաժիշտ Դանիել Դեքերը (Դեքերյան) նպատակ ունի Հայոց ցեղասպանության մասին նոր նախագծով հանդես գալ, ամենայն հավանականությամբ, կլինի ֆիլմ:

«Մտքումս ունեմ նման նախագիծ: Գիտեմ, որ շատ ֆիլմեր կան Հայոց ցեղասպանության մասին, բայց ուզում եմ տարբերվող մի  բան անել, ավելի մատչելի եղանակով ներկայացնել հանդիսատեսին այն ողբերգությունը, որ ապրել է հայ ժողովուրդը»,- Panorama.am-ի հետ զրույցում ասաց Դանիել Դեքերը:

Այժմ նա Հայաստանում է, պատրաստվում է հոկտեմբերի 10-ի համերգին:  Ցանկանում է ավելի հաճախ լինել Հայաստանում՝ հայ երաժիշտների, կոմպոզիտորների հետ ավելի շատ ժամանակ անցկացնելու, աշխատելու համար:

Թեև ամերիկացի երգչի երգացանկում արդեն  կան տասնյակից ավելի հայերեն երգեր, թողարկել է «Ես հայ եմ` իմ ընտրությամբ» ձայնասկավառակը, բայց ուզում է ընդլայնել այդ ցանկը, իր համար բացահայտել Առնո Բաբաջանյանի,  Խաչատուր Ավետիսյանի, Կոմիտասի ստեղծագործակած ժառանգությունը և ներկայացնել ինչպես հայ, այնպես էլ արտասահմանցի հանդիսատեսին:

«Ուզում եմ բացահայտել նաև հայկական շարականներն ու ձայնագրել»,- հավելեց Դ. Դեքերը:

Նա խոստովանեց, որ դժվար է հայկական երգեր կատարել, քանի որ, ի տարբերություն անգլերենի, հայոց լեզուն դժվար է, կան տարրեր, ելևէջներ, որոնք բավականին խրթին են, պետք է նաև ընկալել, հասկանալ հայկական երգերի էմոցիոնալ ասպեկտը:

«Հայկական երգերն էմոցիոնալ են, զգայուն, երաժշտությունն արտահայտում է այն ցավը, որ զգացել է հայ ժողովուրդը դարեր շարունակ: Կան նաև տոնական, ուրախ տարրեր երաժշտության մեջ: Բացի այդ՝ շատ անձնական են, հայրենասիրության թեման շատ է հայկական երգերում, այդ երգերով արտահայտվում է այն հպարտություն, որ հայ է»,-  հայերեն երգերն այսպես բնութագրեց Դ.Դեքերը:

Նա նշեց, որ ինքն էլ մեծ հպարտությամբ է կատարում հայկական երգեր:

«Ներկայացրել եմ տարբեր երկրներում՝ Ավստրալիա, Մոսկվա, Կանադա, ԱՄՆ, Սիրիա: Երգերի միջոցով ցանկանում եմ ոչ հայ հանդիսատեսին նախ ներկայացնել հայկական երաժշտությունը, նաև այդ երաժշտության միջոցով ծանոթացնել հայոց պատմությանը, մասնավորապես Հայոց ցեղասպանության մասին պատմել: Ինձ համար կարևոր է ոչ հայ հանդիսատեսին, տարբեր խմբերի մարդկանց պատմել այդ ողբերգության մասին, ովքեր նույնիսկ չեն էլ լսել այդ մասին: Այսպես լինելով մասամբ փաստաբան՝  ցանականում եմ նպաստել Հայոց ցեղասպանության միջազգային ճանաչմանը»,- ասաց երգիչը:

Հարցին, թե  հայկական անձնագիրը, հայկական ազգանունի «յան» վերջավորությունը ի՞նչ է փոխել երգչի կյանքում, Դ.Դեքերը պատասխանեց. «Հայ ժողովորդի հետ կապն ավելի է ուժեղացել,  բացի այդ՝ աջակցել հայ ժողովրդին՝ լինելով նրանցից մեկը»:

Խոսելով առաջիկա համերգի, ծրագրի, հյուրերի մասին, նա նշեց, որ ակնկալում է ֆանտաստիկ երեկո, համերգը նվիրում է  Հայաստանի մայրաքաղաք Երևանի տոնին:

«Սա իմ նվերն է Հայաստանին՝ որպես նոր հայ, նոր հայաստանցի»,- հավելեց նա:

Երեկոյին հնչելու են միայն հայերեն երգեր՝ «Դլե Յաման», «Մարտիկի երգը», «Հայոց աշխարհ», «Էրեբունի-Երևան» և այլն: Համերգին ելույթ են ունենալու Անդրե Սիմոնյանը, Նունե Եսայանը, Համլետ Գևորգյանը և ուրիշներ, նաև թուրքահայ երգչուհի Սիբիլը:

«Սա իմ և Սիբիլի առաջին համագործակցությունն է: Որոշ ժամանակ է` ուզում ենք միասին աշխատել: Վերջապես հայաստանյան համերգը մեզ տվեց այդ հնարավորությունը: Դուետ ենք կատարելու»,- ասաց նա:

Դանիել Դեքերը ցանկություն ունի երևանյան համերգից հետո հանդես գալ նաև Արցախում:

http://www.panorama.am/am/news/2016/10/05/%D4%B4%D5%A1%D5%B6%D5%AB%D5%A5%D5%AC-%D4%B4%D5%A5%D6%84%D5%A5%D6%80/1654488