Հունգարիայում մերժվել է Հայոց ցեղասպանության վերաբերյալ բանաձևը

Հունգարիայի Կանաչների կուսակցության (LMP) ներկայացրած Հայոց ցեղասպանության վերաբերյալ բանաձևը Հունգարիայի խորհրդարանի արտաքին հարաբերությունների հանձնաժողովում մերժվել է Ֆիդեսզ և Յոբբիկ կուսակցությունների քվեներով: Այդ մասին, ըստ Akunq.net-ի, հաղորդում են թուրքական լրատվամիջոցները:

Հունգարիայի` 199 անդամ ունեցող խորհրդարանում 5 պատգամավորով ներկայացած LMP-ի (Կանաչների կուսակցություն) առաջարկած բանաձևը մերժվել է Հունգարիայի խորհրդարանի արտաքին հարաբերությունների հանձնաժողովում իշխող կուսակցություն Ֆիդեսզի և երկրում երկրորդ մեծ կուսակցությունը համարվող Ժոբբիկի քվեներով:

Հարցը պետք է թողնել պատմաբաններին և իրավագետներին

Ժոբբիկ կուսակցության արտաքին հանձնաժողովի նախագահ Մարտոն Գյոնգյոսին, արձագանքելով Կանաչների կուսակցության կողմից ներկայացված բանաձևին, հայտնել է, որ անհրաժեշտ է հարցը թողնել պատմաբաններին և նշել. «Սխալ է Հունգարիայի ազգային խորհրդարան բերել այն թեման, որի վերաբերյալ պետք է պատմաբաններն ու իրավագետները որոշում կայացնեն: Սա շատ խառը թեմա է: Ինձ անհանգստացնում է, որ մեզ ներկայացնում եւ մեզանից կարծիքներ են ակնկալում 100 տարի առաջ տեղի ունեցած մի իրադարձության մասին, որի վերաբերյալ անգամ պատմաբանները հակասական տեսակետներ ունեն: Այս թեման պետք է թողնել պատմաբաններին եւ միջազգային իրավունքի մասնագետներին»:

Պետք չէ քվե ստանալու համար նման քայլերի դիմել

Գյոնգյոնսին, ուշադրություն հրավիրելով այն հանգամանքին, որ որոշ քաղաքական գործիչներ եւ կուսակցություններ թեմայի վերաբերյալ սխալ կարծիքներ են հայտնում, նշեց. «Հունգարիայի խորհրդարանին չեն վերաբերում Ֆրանցիսկոս պապի, այլ քաղաքական գործիչների կամ այլ խորհրդարանների ասածները: Քվե ստանալու համար չպետք է նման քայլեր կատարվեն: Ըստ իս՝ խորհրդարաններն էլ այսպիսի հարցերում պիտի պատասխանատու գործեն եւ կարծիք չարտահայտեն: Այդ պատճառով մենք, որպես Ժոբբիկ, մերժում ենք այս բանաձևը»:

Հունգարիայի խորհրդարանի արտաքին հարաբերությունների հանձնաժողովում տեղի ունեցած հանդիպմանը մասնակցել են Բուդապեշտում Թուրքիայի արտակարգ եւ լիազոր դեսպան Շաքիր Ֆաքալըն, Ադրբեջանի արտակարգ և լիազոր դեսպան Վիլայեթ Գուլիեւը եւ Ֆադըլ Բաշարը՝ Թուրքիայի Անկախ արդյունաբերողների ու գործարարների միության ներկայացուցիչը Հունգարիայում:

Անցյալ տարի եւս Կանաչների կուսակցության կողմից ներկայացված բանաձևը մերժվել էր Ժոբբիկի քվեներով:

Պատրաստեց Ալլա Եղոյանը

Akunq.net