Ստամբուլի քաղաքապետի մասնակցությամբ բացվել է հայտնի հայ ճարտարապետների ընտանեկան գերեզմանակոթողը

Ստամբուլի հայկական գերեզմանատանը հոկտեմբերի 1-ին տեղի է ունեցել պոլսահայ հայտնի ճարտարապետներ Պալյանների ընտանեկան գերեզմանակոթողի բացումը։

Թուրքական Milliyet-ի փոխանցմամբ՝ Հրաչ եւ Հակոբ Քրմզյան եղբայրների հովանավորությամբ կառուցված Պալյանների գերեզմանակոթողի բացմանը մասնակցել են Պոլսո հայոց պատրիարքական ընդհանուր փոխանորդ, արք․ Արամ Աթեշյանը, Ստամբուլի քաղաքապետ Քադիր Թոփբաշը, Թուրքիայի մշակույթի եւ տուրիզմի փոխնախարար Օմեր Արըսոյը, հայ համայնքի բազմաթիվ ներկայացուցիչներ եւ լրագրողներ։

Բացման ժամանակ ելույթով հանդես եկած Հրաչ Քրմզյանը հարցրել է, թե արդյոք հնարավո՞ր է Ստամբուլի համար այդքան բան արած Պալյանների անունով փողոց կամ պողոտա կոչել։ Այս խոսքերին ներկաները ծափերով են պատասխանել։

Ստամբուլի քաղաքապետ Քադիր Թոփբաշն իր խոսքում շեշտել է, որ Պալյանների ընտանիքի ճարտարապետները 18 եւ 19-րդ դարերում Ստամբուլում ճարտարապետական հրաշք կառույցներ են ստեղծել։

Գերեզմանակոթողը կառուցած Դավիթ Այնալըն նշել է, որ կոթողը կառուցել է Բեշիքթաշում Պալյանների կողմից կառուցված Սուրբ Աստվածածին եկեղեցու խորանի տեսքով։

Նշենք, որ Պալյանների ընտանիքի ճարտարապետների կառուցած պալատները, աշտարակները, եկեղեցիներն ու մզկիթները ներկայում Ստամբուլի զբոսաշրջության այցեքարտերն են համարվում։

http://news.am/arm/news/349626.html