Դինքին սպանողը մանրամասներ է հայտնել իր հետ լուսանկարված ոստիկանների և աղմկահարույց տեսագրությունների մասին

Պոլսահայ լրագրող, Ստամբուլի հայ համայնքի թերթերից «Ակօս»-ի հիմնադիր և գլխավոր խմբագիր Հրանտ Դինքին սպանած Օգյուն Սամասթը Դինքի սպանության և սկանդալային տեսագրության վեևաբերյալ իր վկայության մեջ մանրասներ է հայտնել տեսանյութերում իր հետ լուսանկարված ոստիկանների մասին: Այս մասին գրում է թուրքական «Միլլիյեթ» թերթը:

Սամասթը հայտնել է, որ դեպքի վայրում արված տեսանյութերը ոչ թե անվտանգության սարքերի արխիվներից են հանված, այլ` դեպքի վայրում իրեն հետևող անձանց կողմից:

Բանտում նկարահանված տեսագրության մասին Սամասթը հայտնել է, որ իրենց նկարել է ժանդարմներից մեկը, որի ուսադիրին նա նկատել է մի քանի աստղ, սակայն չի հիշում, թե քանիսն էինք դրանք:

Ըստ Սամասթի` բացի ժանդարմից նրանց նկարահանել է ևս մեկ հոգի, սակայն համացանցում հայտնված կադրերը հենց ժանդարմի արած կադրերն են:

Նա հայտնել է, որ ավելի ուշ իր կողքին նստած տղամարդը լուսանկարվելուց հետո նույնպես ոստիկանական համազգեստ է հագել:

Սամասթը նաև հավելել է, որ այդ օրը իր հետ լուսանկարվող անձինք դեպքի հետ կապված ոչինչ չեն հարցրել իրեն, միայն փորձել են ճշտել, թե ո՞ւմ է նա ճանաչում Ստամբուլի և Տրապիզոնի ժանդարմերիայից:

Սամասթը տեղեկացրել է, որ տեսանյութի իրական տևողությունը 2.5 ժամ է, և դրանցում առկա են սպանության հետ կապ ունեցող մի շարք անձանց անուններ, նրանց վերաբերվող խոսակցություններ:

Իր ցուցմունքում Օգյուն Սամասթը հայտնել է այդ օրը ժանդարմների հեռախոսային խոսակցությունների ժամանակ իր լսած միայն մեկ անուն` Ռամազան Աքյուրեք: Ինչպես հայտնի է` Ռամազան Աքյուրեքը 2007թ. եղել է Տրապիզոնի անվտանգության գլխավոր վարչության պետը:

«Ինձ հետ լուսանկարվող անձը մի պահ վեր կացավ, քայլեց սենյակով, նրա հեռախոսը զանգեց, միայն լսեցի որ ասաց. Ռամազան եղբա՞յր, Ռամազա՞ն, Աքյուրե՞քը, Ռամազան Աքյուրե՞քը»,- պատմել է նա:

Նշենք, որ առաջին տեսանյութում երևացող սպաները, որոնք փաստացի արդեն մեղադրվում են Դինքի սպանության գլխավոր պատասխանատուն լինելու համար, կասկածվում են հուլիսի 15-ի հեղաշրջման փորձի կազմակերպման համար մեղադրվող Ֆեթուլլահ Գյուլենի կազմակերպության հետ կապերի և հեղաշրջման փորձին մասնակցություն ունենալու համար:

Հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը ներկայում բնակվում է ԱՄՆ Փենսիլվանիա նահանգում:

Հրանտ Դինքը սպանվել է 2007թ. հունվարի 19-ին` Ստամբուլի Շիշլի թաղամասում գտնվող «Ակօս» թերթի խմբագրատան առջև` 16-ամյա թուրք ազգայնական Օգյուն Սամասթի կրակոցից: Հրանտ Դինքի սպանության վերաբերյալ դատավարությունը ձգվում է արդեն գրեթե 10 տարի և դեռևս չի գտել իր հանգուցալուծումը: Դինքի սպանության գործով դատական նոր նիստերը տեղի են ունեցել սեպտեմբերի 26-ին, 27-ին, 28-ին և 29-ին:

http://www.tert.am/am/news/2016/10/04/hrantdink/2152555