Հրապարակվել է «Ստամբուլի հնագույն ընտանիքները» անվանումով ցանկ, որում տեղ են գտել նաև հայազգի Բալյանները

Թուրքական «Սաբահ» թերթը հրապարակել է «Ստամբուլի հնագույն ընտանիքները» անվանումով ցանկ, որում տեղ են գտել նաև հայազգի Բալյանները: 

Թերթն այդպես էլ խուսափել է խոսել Բալյանների հայկական ծագման մասին և բավարարվել է պարզապես «Բալյան ընտանիք» ձևակերպմամբ:

Ինչպես հայտնի է, Բալյանների գերդաստանը եղել է օսմանյան շրջանի ամենանշանավոր ճարտարապետների գերդաստաններից մեկը, որի անդամները կառուցել են Ստամբուլի ամենահայտնի պալատներից ու մզկիթներից շատերը: Մինչդեռ Թուրքիայում խուսափում են խոսել Բալյանների հայկական ծագման մասին: Հաճախ զբոսաշրջիկներին ուղեկցող էքսկուրսավարները նրանց մասին պատմում են իբրև «Բալյանի» իտալական տոհմ:

Անդրադառնալով հայտնի Դոլմաբահչե պալատի ճարտարապետ Կարապետ Բալյանին՝ «Սաբահը» նշել է, որ Բալյան ընտանիքի անդամներից Կարապետ Բալյանն իր 30-ամյա գործունեության ընթացքում կառուցել է 7 պալատ, 4 գործարան, 1 մզկիթ, 2 հիվանդանոց, 3 դպրոց, 2 ջրամբար և 7 եկեղեցի:

Հայտնի ճարտարապետի 10 երեխաներից 4-ը՝ Նիկողոսը, Սարգիսը, Հակոբը և Սիմոնը, հետագայում շարունակել են հոր մասնագիտությունը:
Օսմանյան պատմագրության մեջ Բալյանը հիշատակվում է որպես «Դոլմաբահչեն կառուցած ճարտարապետ»։

Նշվում է, որ նա պալատական ճարտարապետ է եղել Մահմուդ Երկրորդ, Աբդուլմեջիթ և Աբդուլազիզ սուլթանների օրոք:
Շեշտվում է նաև, որ Կարապետի հայրը՝ Բալի Քալֆայի թոռ Գրիգորը, առաջինն է սկսել օգտագործել Բալյան ազգանունը: Վերջինս նաև ընկերական հարաբերություններ է ունեցել սուլթան Մահմուդ 2-րդի հետ:
Ի դեպ, օրեր առաջ թուրքական Arkitera.com կայքը հայտնել է, որ հայազգի Բալյան ընտանիքի ընտանեկան դամբարանը նորոգված վիճակում այցելուների համար կվերաբացվի հոկտեմբերի 1-ից:

Ստամբուլի Սուրբ Կարապետ հայկական գերեզմանատանը գտնվող դամբարանը նորոգվել է Ստամբուլում գործող «Հայ ճարտարապետների միության» և Հրաչ ու Հակոբ Քըրմըզյանների անմիջական աջակցությամբ:

http://www.tert.am/am/news/2016/09/30/istanbularmenians/2148893