Թուրքիայի ԱԳՆ-ը հերքել է Հայաստանի հետ սահմանը բացելու մասին տեղեկատվությունը

Թուրքիայի ԱԳՆ-ն հերքել է թուրքական «Taraf» թերթի տարածած` հայ-թուրքական սահմանի բացման վերաբերյալ տեղեկատվությունը:
Թուրքիայի ԱԳՆ-ի հայտարարության մեջ նշվում է, որ Ալիջանի անցագրային կետի բացման մասին տեղեկությունն իրականությանը չի համապատասխանում:
Հայտարարությունում հիշեցվում է, որ Հայաստանի եւ Թուրքիայի միջեւ սահմանը փակվել է 1993թ. Լեռնային Ղարաբաղում հայտնի իրադարձություններից հետո:
Թուրքիայի արտգործնախարարությունը հայտարարել է, որ սահմանի բացումը կարող է օրակարգում հայտնվել միայն իրադարձությունների այնպիսի զարգացման դեպքում, որը կհանգեցներ Հարավային Կովկասի համապարփակ եւ շարունակական կարգավորմանը: Այս համատեքստում կարեւոր է, որպեսզի Հայաստանը իր բոլոր հարեւանների հետ ունեցած խնդիրների լուծման համար կամք դրսեւորի եւ համապատասխան քայլեր ձեռնարկի:
Հիշեցնենք, որ թուրքական «Taraf» թերթը հաղորդագրություն էր տարածել, որտեղ ասվում էր, որ Թուրքիայի վարչապետ Ռեջեփ Թայիփ Էրդողանը հանձնարարել է Հայաստանի հետ սահմանը բացել այս տարվա սեպտեմբերին:
http://news.am/arm/news/217804.html