Հանրապետութեան Նախագահի Գլխաւոր Խորհրդական Մեհմէտ Ուչում յայտարարեց թէ ՓՔՔ-ի առաջնորդ Ապտուլլահ Էօճալան, գործընթացին շրջանակին մէջ ստեղծուած Զինաթափման եւ Ռազմավարական Համակարգման Ենթայանձնախումբին մէջ պաշտօն պիտի ստանձնէ։
Ուչում ըսաւ թէ Իմրալըյի մէջ կառուցուած բնակարանը բանտին կցուած լրացուցիչ մէկ միաւոր է։ Ան այս կիրառումը գնահատեց հետեւեալ բառերով. «Ասիկա բանտին տրուած հնարաւորութիւն մըն է, որպէսզի բանտարկեալը իր դերը լաւ կատարէ։ Ասիկա հանգիստ աշխատանքային միջավայրի մը հասնելու համար ստեղծուած հնարաւորութիւն մըն է»։
«Էօճալան ենթայանձնախումբին մէջ պաշտօնեայ պիտի ըլլայ»
Մինչ գործընթացը կը շարունակուէր, Էօճալանի «կարգավիճակը» եւ վերջին օրերուն Իմրալըյի մէջ կառուցուած շինութիւնը վէճի նիւթ դարձան։ Հանրապետութեան Նախագահ Էրտողանի գլխաւոր խորհրդական Մեհմէտ Ուչում, գործընթացին վերաբերեալ բացատրութիւններ տուաւ։
Ուչում, Էօճալանի հետ վարուած գործընթացը «երկխօսութեան» հիմքի վրայ ընկալելու անհրաժեշտութիւնը շեշտելով, ըսաւ.
«Էօճալանի հետ վարուած երկխօսութեան գործընթաց մըն է։ Նպատակը ունի իր գինը։ Ահաբեկչական կազմակերպութեան լուծարումը ապահովելն է։ Կազմակերպութիւնը ո՛վ որ հիմնած է, զէնքը ո՛վ որ գործածել տուած է, զայն ալ ան պիտի լուծէ։ Այլապէս պետութիւնը անվտանգութեան քաղաքականութեամբ կ’ընէ։ Երկխօսութեան մէջ դիմացինը նկատուած անձին, իր այս պաշտօնը լաւ կատարելու համար, յանձնախումբի մը մէջ պաշտօնավարելը՝ աւելի հանգիստ միջավայրի մը մէջ աշխատելու անհրաժեշտութիւն մըն է, տրուած արտօնութիւն մը չէ։ Պաշտօնին պահանջած միջավայրը ապահովելէ բացի ուրիշ բան չէ, ասկէ դուրս եղածները ճիշդ չեն»։
«Շրջանային օրէնքով» հիմնուած Հսկողութեան եւ Գնահատման Խորհուրդին աշխատանքներուն մասին խօսելով, Ուչում նշեց թէ չորս ենթայանձնախումբ հիմնուած է։ Ուչում յայտարարեց թէ Զինաթափման եւ Ռազմավարական Համակարգման Ենթայանձնախումբին մէջ Էօճալանի պաշտօն պիտի տրուի։
Ուչում ըսաւ թէ օրէնքին մէջ անհատներու օգտագործման վերաբերեալ կանոնակարգումներ կան, եւ պաշտպանեց թէ դատապարտեալի միջոցաւ վարուած երկխօսութիւնը հակաօրինական չէ՝ հետեւեալ խօսքերով. «Եթէ դուն դատապարտեալի մը միջոցաւ երկխօսութիւն մը կը վարես՝ ահաբեկչական կազմակերպութեան լուծարման վերաբերեալ, ասոր մէջ հակաօրինական վիճակ մը չկայ։ Սովորականէն դուրս գործընթացները, սովորականէն դուրս մեթոտներով կը լուծուին»։
«Օրինականօրէն պաշտօնական պաշտօն մը չէ»
Ուչում ըսաւ. «Ասիկա օրինականօրէն պաշտօնական պաշտօն մը չէ։ Ի վերջոյ յանձնաժողովին կառոյցին մէջ ամէն անձէ օգտուելու վերաբերեալ օրէնքին մէջ կանոնակարգում մը կայ։ Եթէ դուն դատապարտեալի մը միջոցաւ երկխօսութիւն մը կը վարես՝ ահաբեկչական կազմակերպութեան լուծարման, զէնք վար դնելու վերաբերեալ, անոր ալ այդ գործընթացը յառաջացնելու համար ստանձնած պարտականութիւնները կատարելու համար հնարաւորութիւն մը կու տաս։ Ասոր մէջ հակաօրինական կողմ մը չկայ։ Սովորականէն դուրս գործընթացները սովորականէն դուրս մեթոտներով կը կառավարուին։ Ահաբեկչութենէ Զերծ Թուրքիոյ գործընթացը սովորական, գործընթաց մը չէ. ասիկա արտառոց, սովորականէն դուրս գործընթաց մըն է։ Սովորականէն դուրս գործընթացները սովորական մեթոտներու սահմանափակումներով չես կրնար յառաջացնել։ Հոս Էօճալանի հետ կապուած մշակուած մօտեցումը՝ այս սովորականէն դուրս գործընթացին մէջ դեր մը ստանձնած, այդ դերին պահանջները կատարելու համար որոշ հնարաւորութիւններու տէր ըլլալու պարտադրանք ունեցող անձի մը տրուած հնարաւորութիւններ են։ Տրուած հնարաւորութիւնները՝ զէնք հայթայթման գործընթացին վերաբերեալ իր պարտականութիւններուն կատարման համար են։ Սովորական գործընթացներու տեսանկիւնէն այս գործընթացը քննադատել, գնահատել՝ անարդարութիւն պիտի ըլլայ»։
Տեմիրթաշի կացութիւնը
Ուչում խօսեցաւ նաեւ 2016 Նոյեմբերէն ի վեր ձերբակալուած ՀՏՓ-ի նախկին համանախագահ Սելահատտին Տեմիրթաշի կացութեան մասին։ Ուչում նշելով թէ Տեմիրթաշի դիմում ընելուն դէմ որեւէ արգելք չկայ, ըսաւ. «Անձին եւ կազմակերպութեան տեսակէտէն իր դատական թղթածրարը այս շրջանակին մէջ կը մտնէ՞ արդեօք, ասիկա պիտի գնահատուի, որոշումը վերաբերեալ դատարանը պիտի տայ»։
https://www.agos.com.tr/am/news/patsahahdvwmnyr-eocalani-bashdonagvchman-masin-41953
Leave a Reply