Էրդողանը` «դուշմանի» և Կարաբեքիր փաշայի մասին

Թուրքիայի վարչապետ Ռեջեփ Թայիփ Էրդողանն անդրադարձել է Աղրըի` [թուրքերն այդպես են անվանում Արարատ լեռանը հարող տարածքը – ՍիվիլՆեթ] ազգությամբ քուրդ քաղաքապետ Սըրրը Սաքըքի խոսքերին, որը քաղաքապետ ընտրվելուց անմիջապես հետո հայտարարել էր, թե վերացվելու են Աղրըում գտնվող՝ Քազըմ Կարաբեքիրի անունը կրող փողոցների ու պողոտաների վահանակները:
Haberturk-ի հաղորդմամբ՝ Էրդողանը պատասխանել է քուրդ քաղաքապետին և ասել. «Էրզրումը, Կարսը, Աղրըն թշնամուց փրկած զորքի հրամանատար Քազըմ Կարաբեքիրի անունը նախևառաջ մեր ժողովրդի սրտում է և հոգում: Ժողովուրդը այդ վահանակից ավելի մեծն ու շքեղը կբերի և վաղը նորից տեղը կդնի»:
Նախկին երիտթուրքական գործիչ Կարաբեքիր փաշան մեծ դեր է խաղացել Երզնկայի, Էրզրումի (Կարին-Ակունքի խմբ.) գրավման գործում, իսկ արդեն 1920թ. վերջին հայ-թուրքական պատերազմի ժամանակ նրա գլխավորած բանակը գրավել է Սարիղամիշը, Կարսը, Արդահանը, Արդվինը և այլ բնակավայրեր: Քազըմ Կարաբեքիր փաշան գլխավորել է թուրքական պատվիրակությունը Ալեքսանդրապոլի և Կարսի բանակցություններում: Հենց Կարսում է տեղադրված նրա մեծադիր արձանը:
Թուրքական պատմագրության մեջ Քազըմ Կարաբեքիր փաշան հայտնի է որպես «Հայաստանը վերացնող» և «թուրքական հողերի ազատագրող»: Թուրքիայի Հանրապետության հռչակումից հետո նախկին մարտակիցներ Կարաբեքիր փաշայի և Թուրքիայի նախագահ Մուստաֆա Քեմալի հարաբերությունները սրվեցին: Կարաբեքիրի պնդմամբ՝ թուրքերի մղած «ազգային ազատագրական պայքարում» ինքն ավելի մեծ դեր է խաղացել, քան նույնիսկ Քեմալը:
http://civilnet.am/erdogan-karabekir-pasa-agri-mayor/