Financial Times. Էրդողան` թուրք ազգին պառակտող մարդ

Անգլիական «Financial Times» թերթը Թուրքիայի վարչապետ Ռեջեփ Թայիփ Էրդողանի վերջին 10 տարվա գործունեության վերաբերյալ 2 վերլուծություն է ներկայացրել: Թերթի հոդվածագիր Լեյլա Բալթոնն իր վերլուծականը վերնագրել է` «Էրդողան. թուրք ազգին պառակտող մարդ»:

Բալթոնի հոդվածում մասնավորապես նշվում է, որ էրդողանը կարծես խիզախ բարեփոխողից վերածվել է  դյուրագրգիռ ավտորիտար գործչի: Նա նաև գրում է, որ Գեզիի ցույցերը ցույց տվեցին, թե 10 տարվա առաջվա Թուրքիան ինչքան է փոխվել:

Հոդվածագիրը գրում է, որ վերջին անգամ Թուրքիա այցելելիս նկատել է, որ 10 տարի առաջ Էրդողանին գրկաբաց ընդունող թուրքերը հիմա նրա հանդեպ օտարացել են:

 «Կարծում էինք, թե նա ժողովրդավար է, սակայն ներկայում բռնապետի է վերածվել»,-գրում է Բալթոնը և հավելում, որ Էրդողանի ոչ ժողովրդավար մոտեցումները հաճախ հակասությունների պատճառ են դառնում նաև նախագահ Աբդուլլահ Գյուլի և փոխվարչապետ Բյուլենթ Արընչի հետ:

Թերթի մեկ այլ հոդվածագիր` Դենիել Դոմբին, ով ներկայացրել է Էրդողանի վերաբերյալ 2-րդ վերլուծությունը, իր հոդվածը վերնագրել է` «Էրդողանը շարժվում է դեպի անհայտ ջրեր»: Նա գրում է, որ Էրդողանի նպատակը մինչ 2023 թվականը Թուրքիան աշխարհի ամենամեծ տնտեսությունը ունեցող 10-րդ երկիրը դարձնելն է: Իսկ դրա համար տարեկան 15% տնտեսական աճ է հարկավոր, և դա անհնար է թվում:

Նա նաև գրում է, որ Գեզիի դեպքերը ցույց տվեցին Թուրքիայի քաղաքական անկանխատեսելիությունը: 

Ըստ Դոմբիի` ցույցերից հետո հնարավոր է` մարդկանց զայրույթը մի քիչ մեղմացել է, սակայն այս դեպքերի մասին հիշողությունները դեռ չեն անհետացել, և հնարավոր է, որ երկիրը Էրդողանի պլանավորված ուղղությամբ չընթանա:

http://ermenihaber.am/?lang_id=2&news_=7&cur_news=1060