Երբ քրտերէնը այլեւս կերպով մը ընդունուած լեզու դարձած է, եւ կառավարութիւնն ալ դէմ չէ մայրենի լեզուներու գործածութեան, Մէ-Հէ-Փէ կուսակցութիւնը կը շարունակէ դիրք գրաւել քրտերէն լեզուի հրապարակաւ գործածութեան դէմ։ Այս կարգէն նոր օրինակ մը եկաւ Ֆէթհիյէի Մէ-Հէ-Փէ-ցի քաղաքապետ Պէհչէթ Սաաթճիի դէմ կուսակցութեան կեդրոնէն արձակուած արտաքսումի որոշումով։ Պէհչէթ Սաաթճի կուսակցութենէն արտաքսուեցաւ անոր համար, որ ան Գուրպան Պայրամի օրերուն քրտերէն ու թրքերէն լեզուներով խառն շնորհաւորագիրներ հրատարակած էր։ Մէ-Հէ-Փէ կուսակցութեան կեդրոնը չէր կրցած հանդուրժել քրտերէնով կատարուած այս շնորհաւորագրին ու կարգապահութեան յանձնախումբին յանձնած էր խնդիրը։ Քաղաքապետն ալ կուսակցութենէն հրաժարած էր` առանց սպասելու յանձնախումբին որոշումին։
Հակառակ որ արդէն կուսակցութենէն հրաժարած էր, նախկին քաղաքապետ Սաաթճըին դէմ, ձեւակերպական ալ ըլլայ, արտաքսումի որոշում հրատարակուեցաւ։ Մէ-Հէ-Փէ տակաւին պատրաստ չէ ընդունելու Քքտերէն լեզուի հրապարակաւ գործածութիւնը։
Leave a Reply