Թուրք հոդվածագիր. Հայոց ցեղասպանության ճարտարապետ Թալեաթը ներկայացվում է որպես պետական մեծ գործիչ

Թուրք սյունակագիր Այշե Գյունայսուն երիտթուրք առաջնորդներից Թալեաթ փաշայի և Թուրքիայի Հանրապետության երկրորդ նախագահ Իսմեթ Ինոնյուի մասին հոդված է հրապարակել, որտեղ անդրադառնում է Հայոց ցեղասպանության փաստին: «Յեշիլ գազեթե» կայքի (հոդվածն ի սկզբանե հրապարակվել է «Օզգյուր գյունդեմ» կայքում-Ակունքի խմբ.) իր սյունակում թողարկված հոդվածով Այշեն ուշադրություն է հրավիրում 2006 թ. տպագրված «Իսմեթ Ինոնյու-հուշագրություններ» գրքի որոշ հատվածների վրա:

«Հուշերն ընթերցելիս, ի թիվս այլ հետաքրքիր թեմաների, ես հանդիպեցի նաև Թալեաթ փաշայի մասին դիտարկումների: Հայոց ցեղասպանության ճարտարապետ Թալեաթ փաշան, ոչնչացման ծրագիրը մաթեմատիկոսի սառնասրտությամբ կազմած այդ անձը «ազգի շեֆ» Իսմեթ Ինոնյուի կողմից ներկայացվում է որպես Միություն և առաջիմություն կուսակցության ամենաարժեքավոր անդամ: Փութաջանորեն գովերգվում է Թալեաթի սառնասրտությունը: Մոտավորապես 3 էջ Թալեաթ փաշան` մի ամբողջ ժողովրդի ոչնչացման օպերացիայի գլուխ կանգնած այդ մարդը, ընթերցողին ծանոթացվում է որպես պետական մեծ գործիչ»,- ապշանք է հայտնում հոդվածագիրը:

Թուրքերի կողմից հայերի ու քրդերի հանդեպ իրականացվող քաղաքականությունը, ըստ հոդվածի հեղինակի, իր էությամբ մնացել է նույնը, ինչպես երիտթուրքերի օրոք, այնպես էլ հանրապետական ժամանակաշրջանում:

http://ermenihaber.am/?lang_id=2&menyu_id=3&top_current=84