Թուրքիայում գանձ գտնելու համար եկեղեցու հիմքերը քանդողը սրտի կաթված է ստացել

Թուրքիայի Տրապիզոն նահանգի Չամոբա գյուղում գտնվող պատմական եկեղեցում ոսկի գտնելու հույսով 2 արկածախնդիր եղբայրներ հսկայական թունել են փորել, սակայն եկեղեցի մտնելու պահին հանդիպել են իրենց սպասող ժանդարմերիային։

Թուրքական Milliyet-ի փոխանցմամբ՝ Ալի եւ Մեհմեդ եղբայրները Տրապիզոնի Չամոբա գյուղի պատմական եկեղեցում ոսկի գտնելու հույսով մոտ 50 մետր թունել են փորել, որի հողը հեռացնելու համար նույնիսի երկաթգիծ են ամրացրել եւ լույս քաշել։

Նրանց ծրագրերի մասին տեղեկացել է շրջանի ժանդարմերիան եւ եղբայրներին սպասել եկեղեցու ներսում։ Այն պահին, երբ եղբայրները արդեն թունելից դուրս են եկել եկեղեցու ներսի տարածք՝ իրենց դիմաց տեսել են ժանդարմերիայի ծառայողներին եւ շոկի մեջ ընկել։ Եղբայրներից մեկը տեղում սրտի կաթված է ստացել եւ արագ տեղափոխվել հիվանդանոց։

Մյուս եղբորը ձերբակալել են եւ տեղափոխել դատարան, որտեղից նա ստորագրությամբ ազատ է արձակվել։ Մինչ դատարանի որոշումը եղբայրներին արդեն 6000 լիրայով տուգանել են` անօրինական հոսանք օգտագործելու համար։

http://news.am/arm/news/182242.html