Թուրքիայում նոր Սահմանադրության ընդունման աշխատանքները ձախողվում են: Թուրքիայի Ազգային մեծ ժողովի նախագահ Ջեմիլ Չիչեքը նամակ է ուղարկել մեջլիսում ներկայացված քաղաքական կուսակցություններին` հայտնելով, որ Սահմանադրության համաձայնեցման հանձնաժողովին չի հաջողվել համաձայնության հասնել բոլոր խնդիրներում, որի հետևանքով հնարավոր չէ նոր Սահմանադրություն կազմել:
Չիչեքն ընդգծում է, որ ապագա Սահմանադրության վերաբերյալ հարցերում քաղաքական կուսակցություններն ունեն հակադիր մոտեցումներ: Այս պայմաններում Չիչեքն անիմաստ է համարում իր` Սահմանադրության համաձայնեցման հանձնաժողովի նախագահի պաշտոնում մնալը:
Սահմանադրության համաձայնեցման հանձնաժողովը ստեղծվել էր դեռևս 2012թ. հոկտեմբերին և պետք է քննարկեր ապագա Սահմանադրության հետ կապված հարցերը: Հանձնաժողովում ընդգրկված են Թուրքիայի մեջլիսի բոլոր կուսակցությունները: Չնայած խորհրդարանական ընտրություններում Էրդողանի գլխավորած Արդարություն և զարգացում կուսակցությունը հաղթանակ է տարել, սակայն չունի բավարար ձայներ` նոր Սահմանադրության ընդունման համար:
Leave a Reply