Թուրքիան Հայաստանի հետ հարաբերությունների կարգավորման համար դրական ազդակներ է տալիս. «Միլլիյեթ»-ի արձագանքը

Ադրբեջանի ու Հայաստանի՝ Լեռնային Ղարաբաղի հակամարտությունը լուծելու անհրաժեշտության շուրջ համաձայնության գալուց հետո, Անկարան Հայաստանի հետ երկկողմ հարաբերությունները լավացնելու գործընթացն արագացնելու աշխատանքներ է սկսել, գրում է թուրքական «Միլլիյեթ» օրաթերթը։

Դիվանագիտական աղբյուրները, հիշեցնելով Թուրքիայի արտգործնախարար Ահմեթ Դավութօղլուի խոսքերը, թե «Հայաստանը պետք է ազատի գրաված տարածքները», նշում են, որ Թուրքիան, հայ-ադրբեջանական ձեռնարկվելիք քայլերին զուգահեռ, կարող է բացել Հայաստանի հետ սահմանը։

Հայաստանի նախագահ Սերժ Սարգսյանի հետ Վիեննայում կայացած հանդիպումից առաջ Ադրբեջանի նախագահ Իլհամ Ալիևը եղել էր Թուրքիայում։ Դավութօղլուի հետ հանդիպման ընթացքում օրակարգի հիմնական կետը եղել էր Լեռնային Ղարաբաղի հարցը։ Ղարաբաղյան հակամարտությունը Դավութօղլուն քննարկել էր նաև Վաշինգտոն կատարած այցի ընթացքում։

ԱՄՆ պետքարտուղար Ջոն Քերին էլ Ալիևի և Սարգսյանի հետ հեռախոսազրույցներ էր ունեցել։ Նախագահները Վիեննայում համաձայնության եկան՝ մինչև տարեվերջ ջանքերն ակտիվացնելու վերաբերյալ։

Հայաստանի արտգործնախարար Էդվարդ Նալբանդյանն ու Ադրբեջանի արտգործնախարար Էլմար Մամեդյարովը դեկտեմբերի 5-6-ին հանդիպելու են Կիևում՝ խնդրի լուծման վերաբերյալ տեսակետներ փոխանակելու համար։

Թուրքիայի արտգործնախարարությունն իր հերթին շարունակում է պատրաստվել Հայոց ցեղասպանության 100-ամյակին։ Անկարայում նշում են, որ պատրաստ են Հայաստանի հետ հարաբերությունների կարգավորման փուլին ու սահմանի բացմանը։

Ըստ առկա տեղեկությունների՝ Թուրքիան «Զրո խնդիր հարևանների հետ» քաղաքականության շրջանակներում պատրաստ է վճռական քայլեր ձեռնարկել Հայաստանի հետ հարաբերությունների կարգավորման համար, բայց այս ժամանակահատվածում շարունակելու է հետևել Ադրբեջանի քաղաքականությանը։

Թուրքիայի վարչապետ Ռեջեփ Թայիփ Էրդողանն էլ Ռուսաստան այցի ընթացքում է անդրադառնալու ԼՂ խնդրին։ Ակնկալվում է, որ պատվիրակության անդամ Ահմեթ Դավութօղլուն այս այցի ընթացքում պահանջելու է, որ ԵԱՀԿ Մինսկի խմբի միջնորդական ջանքերն ակտիվանան Հայաստանի և Ադրբեջանի հարաբերությունների կարգավորման ուղղությամբ։

http://www.tert.am/am/news/2013/11/22/armenia-turkey-milliyet/