Ստամբուլում սպանված տարեց հայ կնոջ ազգականները դժգոհ են դատավարությունից

Այս տարվա հունվարին Ստամբուլի Սամաթյա թաղամասում սպանված 84-ամյա հայուհի Մարիցա Քյուչյուքի ազգականներն ու թուրք իրավապաշպաններն օրերս համատեղ մամուլի ասուլիս են ունեցել, որի ժամանակ պահանջել են ավելի համապարփակ և ընդլայնված հետաքննություն ու դատավարություն իրականացնել։

Ստամբուլում կայացած ասուլիսին մասնակցել է թուրքական «Մարդու իրավունքների միություն» իրավապաշտպան կազմակերպության անդամները, ինչպես նաև սպանված հայուհու ազգականները։ Նրանք դժգոհել են դատավարության ընթացքից և պահանջել նոր հետաքննություն՝ շատ ավելի հանգամանալից քննությամբ։

Մասնավորապես, փաստաբանների, իրավապաշտպանների և սպանվածի հարազատների ուշադրությունը գրավել է այն, որ սպանության համար մեղադրվող Մուրադ Նազարյանը վերջին դատական նիստի ժամանակ հայտարարել էր, թե իրական մարդասպանները երեք հոգի են, և նրանք փորձել են սպանության մեղքն իր վրա բարդել։

Մամուլի ասուլիսի ժամանակ նշվել է, որ Նազարյանին թույլ չեն տալիս ազատորեն խոսել, իսկ նրա հայտարարությունների հիման վրա նոր քննություններ չեն անցկացվում։ Միևնույն ժամանակ մասնակիցները կոչ են արել նույն գործով քննել նաև տարեսկզին մյուս տարեց հայուհիների վրա հարձակումները։

Հիշեցնենք, որ սպանության համար մեղադրվող Նազարյանն իր ցուցմունքում նշել է, թե իրեն սպառնացել են 3 անձինք, ովքեր ստիպողաբար տարել են նրան  84-ամյա հայուհի Մարիցա Քյուչյուքի տուն և այնպես արել, որպեսզի սպանություն կատարողը նա համարվի։ Մասնավորապես, նրանք կտրել էին Նազարյանի մատը և թողել, որ արյունահոսի, որպեսզի ԴՆԹ-ի հետքերը նրան ցույց տա։

Նա նաև հավելել է, թե տարեց կնոջը ծեծելով և դանակի հարվածներով սպանելով` նրանք փորձել են կոծկել գողությունը։ Վերոնշյալ անձինք սպառնացել են Նազարյանին վնասել նրա հարազատներից, եթե նա այդ մասին պատմի։

Նազարյանը նաև նշել է, որ վախենում է և բանտում իրեն ապահով չի զգում, իսկ երկար ժամանակ լռում էր այդ սպառնալիքների պատճառով, սակայն այժմ պատրաստ է ճանաչել հանցագործներին, եթե նրանց նկարները լինեն։

Նշենք, որ այս տարվա սկզբին Ստամբուլի Սամաթյա թաղամասում հարձակումներ էին եղել տարեց հայուհիների վրա։ Հարձակումներից մեկի ժամանակ դաժանորեն սպանվել էր 84-ամյա Մարիցա Քյուչյուքը, ևս 3 տարեց հայուհիներ տարբեր վնասվածներ էին ստացել, իսկ նրանցից մեկը զրկվել էր աչքից։

Թուրքական ոստիկանությունն օրեր անց ձերբակալել էր Թուրքիայի հայ քաղաքացի Մուրադ Նազարյանին, ում էլ մեղադրանք առաջադրվեց հարձակումների և սպանության համար։ Սակայն Նազարյանի կողմից սպանություն և հարձակում իրականացնելը բավական կասկածելի է թվում. նա ֆիզիկապես թույլ և որոշակի հոգեկան խնդիրներ ունեցող մարդ է։

allTurkey.am