Մերձավոր Արևելքում տեղի ունեցող գործընթացներով պայմանավորված՝ տարածաշրջանում Թուրքիայի դիրքերը բավական խարխուլ վիճակում են։ Այսօր լրագրողների հետ հանդիպմանն ասաց թուրքագետ Անդրանիկ Իսպիրյանը: Թուրքագետը հայ-թուրքական հարաբերությունների հնարավոր կենդանացումը պայմանավորում է Հայոց ցեղասպանության 100-րդ տարելիցի մոտենալու և տարածաշրջանում Թուրքիայի թուլացող ազդեցության հետ։
Ինչ վերաբերում է ղարաբաղյան հարցում թուրքական հնարավոր ազդեցությանը, ապա թուրքագետն ասաց, որ 2008-ից այս առումով ոչինչ չի փոխվել՝ նույն սցենարն է, նույն խաղացողները. «Թուրքիան ուզում է մեկ-երկու հանդիպումով ղարաբաղյան հարցը լուծել, սակայն դա հնարավոր չէ»։
Խոսելով հայ-թուրքական հարաբերությունների կարգավորման գործընթացի մասին՝ Անդրանիկ Իսպիրյանը նշեց, որ այն մեկնարկի օրից իսկ ձախողված է: Պատճառն այն է, որ հարցը կապվում է ղարաբաղյան խնդրի հետ:
Իսպիրյանը չի բացառում, որ Ցեղասպանության 100-րդ տարելիցի նախօրեին հայ-թուրքական սահմանը բացվի, սակայն հաջորդ օրն իսկ փակվի:
Թուրքիայի ԱԳ նախարար Դավութօղլուի՝ ԱՄՆ-ում օրերս արած հայտարարություններից տպավորություն է ստեղծվում, թե նա օրուգիշեր չի քնում և մտածում է միայն Հայաստանի հետ հարաբերությունների կարգավորման մասին: Իմ կարծիքով՝ հայ-թուրքական հարաբերությունների կարգավորման գործընթացում Հայաստանը մինչ այժմ ոչինչ չի շահել»,- ասաց Անդրանիկ Իսպիրյանը։
Թուրքագետի խոսքով՝ առաջիկայում կայանալիք Պուտին-Էրդողան հանդիպումը էական նշանակություն չի ունենա։
Leave a Reply