Էրդողանից հետո «Քրդստան» բառն արտասանել է նաև Դիարբեքիրի քաղաքապետը

Դիարբեքիրի քաղաքապետ Օսման Բայդեմիրը, CNN Türk-ի եթերում խոսելով Թուրքիայի վարչապետ Ռեջեփ Թայիփ Էրդողանի և Հյուսիսային Իրաքի Քրդական Ինքնավարության ղեկավար Մասուդ Բարզանիի դիարբեքիրյան հանդիպման մասին, առաջին անգամ արտասանել է «Թուրքիայի Քրդստան» բառերը:

Զարմացած լրագրողի հարցին ի պատասխան` Բայդեմիրն ասել է. «Ինչպես Ղրղըզստանին ենք ասում Ղրղըզստան և Տաջիկստանին՝ Տաջիկստան ու Հունաստանին էլ ՝ Հունաստան, այնպես էլ Քրդստանին՝ Քրդստան»: Բայդեմիրը շնորհակալություն է հայտնել Թուրքիայի վարչապետ Էրդողանին «Քրդստան» բառն օգտագործելու համար: Ըստ նրա` Էրդողանի հայտարարությունը «ոչ թե հեղափոխություն է, այլ երկար տարիներ գոյություն ունեցած ամոթի վերացում»: «Թուրքիայի հարավը «Թուրքիայի Քրդստան» անվանելու մեջ որևէ խոչընդոտ չկա»,- ասել է Բայդեմիրը: Իսկ լրագրողի հարցին, թե ինչպես է նա պատկերացնում Թուրքիան ապագայում, Բայդեմիրն ասել է` «Գերմանիայի նման՝ դաշնային սկզբունքով»:

Էրդողանն առաջին անգամ «Քրդստան» բառն օգտագործել է` ասելով. «Սիրով ողջունում եմ Իրաքի Քրդստանի տարածաշրջանի ղեկավար Մասուդ Բարզանիին»:  Էրդողանի այս արտահայտությունը դժգոհություն էր առաջացրել Թուրքիայում: Էրդողանի կողմնակիցները շտապել էին հայտարարել, թե քրդական ինքնավարության պաշտոնական անվանումը Քրդստանի տարածաշրջան է, և որ Էրդողանը ճիշտ անվանումն է տվել:

էրդողանը, խոսելով այն մասին, թե ինչու է  օգտագործել «Քրդստան»  բառը, ասել է, թե ժամանակին Մուստաֆա Քեմալն էլ է այն կիրառել:

Ներկայում թե´ թուրքական մամուլում, թե´ սոցիալական ցանցերում դժգոհություններ են հնչում Օսման Բայդեմիրի արած արտահայտության կապակցությամբ:

http://civilnet.am/2013/11/19/diyarbakir-mayor-says-kurdistan-after-erdogan